Երեւանում Ռուսաստանի գիտության եւ մշակույթի կենտրոնը հոկտեմբերի 25-ին կնշի իր տասնամյակը։ Կրթամշակութային այս օջախի գործունեության հիմնական ուղղություններն են՝ մշակույթի, գիտության եւ կրթության ոլորտում հումանիտար համագործակցությունը, ռուսաց լեզվի աջակցությունը, աջակցություն ռուս հայրենակիցների կազմակերպություններին, խորհրդային եւ ռուսական բուհերի շրջանավարտների միություններին, հասարակական դիվանագիտության ոլորտում ՌԴ-ի հետ համագործակցության զարգացման մեջ շահագրգռված ոչ կառավարական կազմակերպությունների միջտարածաշրջանային եւ նորարարական համագործակցության առաջխաղացմանը, միջազգային զարգացմանը։
Սերգեյ Ռիբինսկին եւ Իգոր Օրլովը
Օրերս կենտրոն էր այցելել Արխանգելսկի մարզի պատվիրակությունը՝ նահանգապետ Իգոր Օրլովի գլխավորությամբ։ Երիտասարդական եւ հասարակական կազմակերպությունների ներկայացուցիչների հետ հանդիպմանը, որին ներկա էր նաեւ «Առավոտը», նահանգապետը նշեց, որ համատեղ ծրագրերի հաջողությունը հնարավոր է երկու կողմերի փոխադարձ հետաքրքրվածության առկայության դեպքում։ «Երիտասարդությանը ես վերաբերվում եմ որպես գործընկերների, որոնց հետ միասին ստեղծելու ենք մեր ապագան»,- ընդգծեց Օրլովը։ Նաեւ պատմեց Արխանգելսկի մարզում երիտասարդական նախագծերի աջակցության համակարգի իրականացման, որոնողական շարժման, տարածաշրջանում ընթացող երիտասարդական ֆորումների մասին, որոնց կարող են մասնակցել հայ երիտասարդները։ Ռուսաստանի գիտության եւ մշակույթի կենտրոնի տնօրեն Սերգեյ Ռիբինսկին էլ փաստեց, որ Հայաստանում ձեւավորվել է ակտիվ երիտասարդների թիմ, որոնք հետաքրքրված են ռուս-հայկական հարաբերությունների զարգացմամբ։ «Օրինակ, բացվել է նոր ձեւաչափով առաջնորդվող հանրային դիվանագիտության դպրոց»,- նշեց տնօրենը։
Տեղի ունեցավ նաեւ ռուս գրող Ֆյոդր Աբրամովի 100-ամյակին նվիրված ցուցահանդեսի բացումը, որը հանդիսանում է «գյուղական արձակի» առավել հայտնի ներկայացուցիչներից։ Գրողի կյանքն ու ստեղծագործությունը ներկայացնող վահանակներից բացահայտեցինք, որ նրա կյանքում եղել են նաեւ «հայկական էջեր», օրինակ, նա բարեկամական հարաբերություններ է ունեցել մեր գրողների հետ, որոնց շարքում առանձնահատուկ տեղ է զբաղեցրել Սիլվա Կապուտիկյանը։
1978թ. Աբրամովը տիկնոջ՝ գրական քննադատ Լյուդմիլա Կրուտիկովայի հետ այցելել է Երեւան, մասնակցել Հայաստանը Ռուսաստանին միավորվելու 150-ամյակի միջոցառումներին։ Բազմաթիվ հյուրերի թվում ամուսինները մասնակցել են հանդիսավոր տարբեր միջոցառումների, ունեցել են հանդիպումներ, այցելել եւ ծանոթացել են հուշարձանների պատմությանը։ Տպավորությունների մասին Աբրամովը գրել է. «Այցս Հայաստան սեփական երկրում եւ արտերկրի բոլոր ուղղություններից գրեթե ամենակարեւորն էր։ Առաջին անգամ եղա այդ զարմանալի, անկրկնելի հողում, որն ամբողջությամբ շնչում է բիբլիական ժամանակներով, եւ որով սրընթաց, մեծ քայլերով ընթանում է արդիականությունը»։
Կարդացեք նաև
Հավելենք, որ Արխանգելսկի մարզի նահանգապետն ու ՀՀ պաշտպանության նախարար Դավիթ Տոնոյանը ծաղիկներ են խոնարհել Հաղթանակի զբոսայգում Անհայտ զինվորի շիրիմին։
Սամվել ԴԱՆԻԵԼՅԱՆ
«Առավոտ» օրաթերթ
12.10.2019
