«Բացարձակ… նման մտադրություն չունեմ, որովհետեւ եթե մենք ապրում ենք իրավական երկրում, ՏԻՄ օրենքն ասում է՝ համայնքի ղեկավարը պարտավոր է երկու ամիսը մեկ ավագանու նիստ հրավիրել, իսկ վեց ամիս չհրավիրելու դեպքում նրա լիազորությունները դադարեցվում են օրենքի ուժով»,-լրագրողների հետ զրույցում այսօր անդրադառնալով հարցին, թե «Նորաշեն համայնքում ստեղծված իրավիճակի հետեւանքով հնարավո՞ր է՝ հրաժարական տաք», ասաց Արարատի մարզպետ Գարիկ Սարգսյանը: Հարցին՝ «եթե նիստեր չեն եղել, ինչպե՞ս են նիստերի արձանագրություններ հայտնվել մարզպետարանի կայքում», Գարիկ Սարգսյանն այսպես արձագանքեց. «Մենք ուսումնասիրություններ ենք արել համայնքապետարանում եւ պարզել, որ նիստեր պատշաճ չեն հրավիրվել՝ այնպես, ինչպես օրենքն է պահանջում՝ ծանուցմամբ, օրակարգի հրապարակմամբ…»:
Սարգսյանը հավելեց, որ իր կողմից նշանակված համայնքապետի ժամանակավոր պաշտոնակատարը կատարում է իր լիազորությունները, եւ համայնքում բնականոն գործընթաց է, իսկ ազատված համայնքապետ Նորայր Գրիգորյանը պատշաճ կերպով հաշվետու չի եղել ավագանու առաջ: Լրագրողները նաեւ հետաքրքրվեցին՝ «կառավարությունից գո՞հ են ձեր աշխատանքից, ձեր պաշտոնանկության հարց քննարկվե՞լ է»: Գարիկ Սարգսյանը պատասխանեց. «Դա որոշում է վարչապետը, աշխատանքի գնահատականը տրվում է տարեվերջին»:
Լուիզա ՍՈՒՔԻԱՍՅԱՆ
