Թուրքիայի ներխուժումը Սիրիա հավելյալ հնարավորություններ է ստեղծում Հայաստանի և Իսրայելի համագործակցության համար: Նման կարծիք «Արմինֆո»-ին հայտնել է իսրայելցի քաղաքական գործիչ, քաղաքագետ Ավիգդոր Էսկինը:
«Թուրքիայի անսանձ, ագրեսիվ բռնկումների ֆոնին ուժեղ Հայաստանը կարևոր է տարածաշրջանի և ամբողջ աշխարհի համար՝ որպես կայունացնող գործոն: Ժամանակն է այս ամենը գիտակցել և աջակցություն ցուցաբերել Հայաստանին՝ ամրապնդման և կայացման գործում»,-ընդգծել է նա:
Էսկինի խոսքով՝ Թուրքիայի ներխուժումը Սիրիա արդեն իսկ հանգեցրել է հարյուրավոր զոհերի: Նա ընդգծել է, որ այս անգամ խոսքը ոչ միայն Սիրիա թուրքական ներխուժման, այլ նաև սունիական ծայրահեղական ահաբեկչական խմբավորումներին երկրի տարածքում տեղակայելու մասին է:
Էսկինի կարծիքով՝ իրադարձությունների նման ընթացքը կասկածի տակ է դնում Սիրիայում ռուսական ռազմական օպերացիայի արդյունքները: Եվ եթե Ռեջեփ Թայիփ Էրդողանին հաջողվի արյունարբու մոլեռանդներին Թուրքիայից տեղափոխել Սիրիա, ապա վերջինիս ապագան կրկին սպառնալիքի տակ կհայտնվի:
Կարդացեք նաև
«Իսրայելում շատ լավ հասկանում են՝ ինչ սպառնալիք է ներկայիս Թուրքիան մերձավորարևելյան ամբողջ տարածաշրջանի համար: Էրդողանի վերջին քայլերը ցույց են տալիս, որ նա ի վիճակի չէ գործել քաղաքակիրթ նորմերի սահմաններում: Իսրայելի վարչապետ Բենիամին Նեթանյահուն խոստացել է օգնել քուրդ աշխարհազորայիններին: Իսկ Իսրայելցի որոշ նախարարներ կոչ են անում ճանաչել անկախ Քրդստանը»,-ամփոփել է Էսկինը:
Պատրաստեց՝ Վիկտորյա ԱՆԴՐԵԱՍՅԱՆԸ
