«Դատարանից դուրս Քոչարյանի աջակիցներն աղմուկ են անում, որ դատարանում մեր խոսքը հասանելի չլինի», – այսօր «Բլից ինֆո» ակումբում հրավիրած ասուլիսում ասաց Մարտի 1-ի գործով փաստահավաք խմբի նախկին անդամ Սեդա Սաֆարյանը:
Նրա խոսքով՝ պաշտպանական կողմի խոսքը հիմնականում լսելի է լինում. «Իսկ այն մասսան, որը հավաքվել է դրսում եւ նպատակ ունի աղմուկով խաթարելու դատական գործընթացի բնականոն հունը, նրան հաջողվում է ե՛ւ աղմուկ ստեղծել, ե՛ւ մինչեւ դատարանի դուռը գալ ու ստեղծել այնպիսի խառնաշփոթ, որ ազդող լինի քո պաշտպանունակության վրա»:
Ըստ Սեդա Սաֆարյանի, պաշտպանության կողմն ամեն ինչ անում է, որ դատաքննությունը ուշ սկսվի, մեղադրական եզրակացությունը չհնչի, մեղադրական եզրակացության մեջ առկա հանգամանքների կապակցությամբ իրենց դիրքորոշումները չբարձրաձայնվեն, եւ հետագայում ապացույցների հետազոտում տեղի չունենա. «Մինչեւ հիմա հայտարարել են, որ գործը չունի լուրջ, ծանրակշիռ ապացույցներ, Ռոբերտ Քոչարյանը մշտապես հայտարարում է, որ իր մեղադրանքը կարված է, հետեւապես, եթե ապացույցները հետազոտվեն ու հրապարակվեն շատ ապացույցներ, կտեսնեն, որ մենք իրականում ինչ հայտարարել ենք, ճիշտ ենք հայտարարել, բխում է գործի նյութերից: Այս առումով էլի կձգեն, ինչ հնարավոր լինի՝ կանեն, առանձին-առանձին միջնորդություններ կներկայացնեն, որպեսզի այս գործընթացը դժվարանա: Ես կարծում եմ, որ դատարանը պետք է միջոցներ ձեռնարկի այս առումով, որովհետեւ Ռոբերտ Քոչարյանը կարող է 4 պաշտպան չունենա, 14 պաշտպան ունենա, դա չի նշանակում, որ նրա 14 պաշտպաններն էլ առանձին-առանձին կարող են դիրքորոշումներ հայտնել նույն հանգամանքի հետ կապված, միջնորդություններ անել նույն հիմքերով եւ այլն՝ սրանով դժվարացնելով նաեւ դատական գործընթացը»:
Կարդացեք նաև
Հռիփսիմե ՋԵԲԵՋՅԱՆ
