ԱԺ փոխնախագահ Լենա Նազարյանի կարծիքով, Հայաստանի կառավարման մարմիններում`օրենսդիր, գործադիր, կանանց ներկայացվածությունը բավական քիչ է. ԱԺ 132 պատգամավորներից միայն 31-ն է կին, կառավարությունում ընդամենը մեկ կին նախարար ունենք, կին մարզպետ չունենք, 45 փոխնախարարներից 13-ն են կին, 37 դեսպաններից՝ 6-ը։
Այս մասին տիկին Նազարյանն ասաց «Կանանց քաղաքական մասնակցության խթանում» թեմայով այսօր կայացած քննարկման ժամանակ, լրագրողների հետ զրույցում:
Լենա Նազարյանն ասաց, որ կառավարությունում և ԱԺ-ում քննարկումներ է նախաձեռնել` կանանց ներգրավվածության նպատակով օրենսդրական մեխանիզմներ ստեղծելու համար:
Իր կարծիքով, կանանց քվոտան Ընտրական օրենսգրքում պետք է հասցնել 40 տոկոսի. «Ներկայումս ԸՕ-ում մի սեռի ներկայացվածությունը չպետք է գերազանցի 70 տոկոսը, ես առաջարկում եմ, որ չպետք է գերազանցի 60 տոկոսը, այսինքն՝ կանանց քվոտան հասցնենք 40 տոկոսի»: Նա նաեւ նկատեց, որ էական է նաեւ մասնագիտական կողմը, բայց ինքը բոլորովին կասկածի տակ չի դնում կանանց մասնագիտական որակները:
Կարդացեք նաև
Aravot.am-ը հետաքրքրվեց`վիճակագրությունը, որը ներկայացրեցիք, հետհեղափոխական շրջանին է վերաբերվում. ի՞նչն էր խանգարում կառավարությանը, որպեսզի ավելի շատ կանանց ներգրավվեր կառավարման տարբեր օղակներում, մանավանդ, իշխող ՔՊ-ում կանանց ներկայացվածությունը բավական մեծ է: Լենա Նազարյանը նախ դժվարացավ հարցին պատասխանել, ապա ասաց. «Մենք երկար ժամանակ փնտրել ենք կին նախարարներ, բայց չենք կարողացել գտնել այդ պահին: Մեր նպատակը և ձգտումը մնում է նույնը, մենք հիմա ստեղծում ենք օրենսդրական հիմքեր, որպեսզի հետագայում իշխանությունները փոխվեն, բայց մշակույթը ձևավորվի, որի արդյունքում հաջորդները հետքայլ չեն կարող անել»:
Մեր դիտարկմանը`գուցե կանայք շահագրգռված են ներգրավվել կառավարման համակարգում այն չափով, որքան արդեն ներգրավված են, Լենա Նազարյանը պատասխանեց, որ եթե ստեղծվեն հնարավորությունները, կանայք այդ հայտը կներկայացնեն:
Այլ մանրամասները`տեսանյութում
Նելլի ԳՐԻԳՈՐՅԱՆ
