Թուրքիայի նախագահ Ռեջեփ Թայիփ Էրդողանը թվիվերյան գրառմամբ հայտնել է այն մասին, որ թուրքական զորքերը ռազմական գործողություն են սկսել Սիրիայի հյուսիսում՝ մի շրջան, որը վերահսկվում է քրդերի՝ Միացյալ Նահանգների դաշնակիցների կողմից:
Գործողության նպատակն է Սիրիայի հյուսիսային շրջաններից դուրս մղել քուրդ աշխարհազորայիններին և ստեղծել «անվտանգության գոտի»: Թուրքիան նպատակ ունի այս գոտի տեղափոխել 3.6 միլիոն սիրիացի փախստականների:
Ինչպես հաղորդում է BBC-ն՝ վկայակոչելով Սիրիայի պետական հեռուստաընկերությանը, թուրքական ավիացիան հարվածել է Ռաս Ալ-Այն քաղաքին: Անկարան ռազմական օպերացիան կոչել է «Խաղաղության աղբյուր»:
Սիրիայի հյուսիսային այս շրջաններում տեղակայված էին ամերիկյան զորքեր: Քուրդ աշխարհազորայինները զգալի օժանդակություն էին ցուցաբերում կոալիցիայի զորքերին և սիրիական ընդդիմությանը Իսլամական պետության զինյալների դեմ պայքարում: Հատկանշական է, որ ԱՄՆ նախագահ Դոնալդ Թրամփը թուրքական ներխուժումից առաջ որոշում կայացրեց դուրս բերել ամերիկացի զինծառայողներին այս շրջանից՝ փաստացի կանաչ լույս վառելով քրդերի դեմ ռազմական գործողության համար:
Կարդացեք նաև
Քրդերը, որոնք ղեկավարում են Սիրիական դեմոկրատական ուժեր անունը կրող կոալիցիան, խստորեն քննադատել են Թրամփի որոշումը՝ այն որակելով որպես հարված մեջքից:
Պատրաստեց՝ Վիկտորյա ԱՆԴՐԵԱՍՅԱՆԸ
