Հոկտեմբերի 7-ին Արարատի մարզի Այնթապ համայնքի Բյուզանդ Մարգարյանի անվան թիվ 2 միջնակարգ դպրոցի 10-րդ դասարանի աշակերտների միջեւ տեղի ունեցած միջադեպի մասին դպրոցի տնօրեն Ալվարդ Սահակյանը տեղեկացել է դեպքից րոպեներ անց: Տիկին Սահակյանը Aravot.am-ին հայտնեց, որ 15-ամյա տղաները մտերիմ ընկերներ են եւ կատարվածի մասին ոչինչ չեն պատմում, ասում են՝ չենք վիճել, կատակել ենք.
«Երկուսն էլ ընդունակ, սովորող տղաներ են, գնում են Թումո, լավ ընկերներ են: Դեպքը շատ անսպասելի էր. 5–րդ դասից հետո դասամիջոցի ժամանակ է եղել, մինչեւ հիմա էլ անհասկանալի է, որովհետեւ երկուսի հետ էլ խոսել եմ, իրենց համար էլ էր անհասկանալի, նրանցից յուրաքանչյուրն այս պահին անհանգստանում է մյուսի համար, նա ասում է՝ միայն թե ընկերս լավ լինի, մյուսն էլ ասում է՝ մեղք էր ընկերս , որ այդ դեպքը եղել է: Իրականում վնասվածքը հասել է եղունգ կտրելիքով, թե ինչպես է դեպքը պատահել, չգիտեմ, որովհետեւ երկուսն էլ ասում են՝ մենք ընկերներ ենք, մեր միջեւ չէր կարող կռիվ լինել: Իրավապահները քննում են, երեկ եղել ենք ոստիկանությունում, հիմա էլ դպրոցում քննում են, կպարզվի, եթե իսկապես վիճաբանություն է եղել, ոչ թե պատահականություն, ընթացքը ցույց կտա»:
Տուժող պատանուն դպրոցի մանկավարժների կանչով է շտապ օգնությունը տեղափոխել հիվանդանոց, բայց տղան դուրս է գրվել, տնօրենի խոսքով, արդեն տանն է. «Լավ է իրեն զգում, երեկ ենք տեսել, վնասվածքը կրծքավանդակի մոտ էր, չգիտեմ, իրենք ասում են՝ չեն խփել, ուղղակի կատակ են արել»:
Արփինե ՍԻՄՈՆՅԱՆ
