Փոխվարչապետ Մհեր Գրիգորյանն այսօր լրագրողների հետ ճեպազրույցում անդրադարձավ հիփոթեքային վարկից օգտվելու եկամտային հարկի վերադարձի պայմանների փոփոխությանը:
Արդյոք մտադրություն կա եկամտային հարկի վերադարձի գործընթացում փոփոխություններ կատարել, չեղարկել այն, քանի որ շատ է խոսվում, որ այս արտոնությամբ պետական բյուջե մեծ գումարներ չեն մտնում. այս հարցին ի պատասխան Գրիգորյանն ասաց. «Իրականության մեջ երբ խոսում ենք թիրախների մասին, մենք պետք է հստակ պատկերացնենք՝ եթե մենք տալիս ենք եկամտահարկի գծով արտոնություն, նշանակում է՝ ինչ-որ չափի գումար բյուջեն չի ստանում, ինչը նշանակում է բյուջետային ծախսերն՝ այդ թիրախավորման, որոշակիորեն դեֆորմացվում են: Իրականության մեջ, որքան դա հնարավոր է, կառավարելի թիրախավորել, այսօրվա օրենսդրությամբ թիրախավորված է՝ առաջնային շուկայից բնակարան ձեռք բերել՝ օգտվելով հիփոթեքային վարկից ու եկամտային հարկի վերադարձից: Դրանից ավելի ի՞նչ կարելի է անել»:
Եկամտային հարկի վերադարձի շեմի փոփոխության քննարկումներ, ինչպես ասաց փոխվարչապետը, կառավարությունում միշտ էլ լինում են. «Որովհետեւ բարելավման ցանկությունը մեծ է, բայց դա պետք է տրամաբանական լինի: Այն, ինչ այսօր կա, սոցիալական շեմ է»:
Անդրադառնալով գազի գնի շուրջ բանակցություններին, Գրիգորյանն ասաց, որ վստահ է՝ Փաշինյան-Պուտին փակ հանդիպմանը շոշափվել է այդ հարցը: Ինչ արդյունք կտան բանակցությունները, Գրիգորյանն ասաց՝ գազի գինը կախված է 3 բաղադրիչներից՝ գին՝ սահմանին, հայկական «Գազպրոմի» ներդրումային ծրագիր, եւ ընթացիկ ծախսերը.«Այս երեք ուղղությամբ քննարկվում է, կարծում եմ երկար չի տեւի»:
Կարդացեք նաև
Նելլի ԲԱԲԱՅԱՆ
