Ինչպես տեղեկացրել էինք, այսօր Երեւանի ընդհանուր իրավասության դատարանում (Շենգավիթի նստավայր) ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստն էր:
Քոչարյանի աշխատակազմի նախկին ղեկավար Արմեն Գեւորգյանի պաշտպանը միջնորդություն ներկայացրեց, որ կամ փոխեն Գեւորգյանի խափանման միջոցը, կամ թույլ տան երկրից բացակայել, քանի որ Արմեն Գեւորգյանը գործնական հանդիպումներ ունի, նաեւ բուժման նպատակ:
Գեորգյանն ուզում է գնալ Ավստրիա՝ բուժզննման:
Կարդացեք նաև
Դատավոր Աննա Դանիբեկյանը հարցրեց, թե ի՞նչ հիվանդություն ունի Արմեն Գեւորգյանը: Պաշտպանը պատասխանեց, որ սրտի հետ կապված հիվանդություն: Այնուհետեւ Արմեն Գեւորգյանը հավելեց, որ սրտանոթային խնդրի պատճառով պետք է մեկնի, նաեւ գործնական հանդիպումներ ունի այնտեղ: Կարող է համատեղել եւ նույն օրերին նաեւ գործնական հանդիպումներն անել, եթե դատավորը թույլ տա:
Մեղադրող դատախազը առարկեց՝ ասելով, որ երկու միջնորդություններն էլ անհիմն են: Ըստ դատախազի, Գեւորգյանը գործնական եւ այլ կապեր ունի երկրից դուրս ու եթե գնա, կմեծացնի քննությունից խուսափելու ռիսկը:
Հիշեցնենք, որ Արմեն Գեւորգյանը մեղադրվում է սահմանադրական կարգի տապալման օժանդակության, կաշառքի եւ փողերի լվացման համար:
Հռիփսիմե ՋԵԲԵՋՅԱՆ
