«Ես այդ օրը իմ ֆեյսբուքյան էջում գրառում եմ կատարել, կարող եք ծանոթանալ: Իմ համար անընդունելի է ցանկացած հարձակում ցանկացած լրատվամիջոցի նկատմամբ: Հայաստանի Հանրապետությունում ժողովրդավարությունը այլընտրանք չունի, առանց ազատ եւ անկախ մամուլի եւ զանգվածային լրատվական միջոցների, իրական ժողովրդավարություն լինել չի կարող: Ինձ թվում է՝ այսքանով ամեն ինչ ամփոփված է: Երեւի թե վերջին շրջանում ամենաշատ ոչ դրական առումով անդրադարձ Hayeli.am կայքը եւ «Հայելի» ակումբը կատարել է իմ նկատմամբ, բայց նույնիսկ այս պարագայում ես հստակ ասում եմ՝ եթե մենք չունենանք ազատ մամուլ, եթե մենք չուզենանք անկախ լրատվամիջոցներ, ապա Հայաստանում ժողովրդավարությունը կարող է վտանգվել: Միանշանակ պետք է նշեմ նաեւ, որ խոսքի ազատությունը անսահմանափակ ազատություն չէ եւ առնվազն դեպքեր կան, որոնց պարագայում այն պետք է սահմանափակվի՝ այլոց վիրավորելու, այլ անձանց զրպարտելու եւ օրենքով արգելված հրապարակումներ կատարելու», – այսօր ԱԺ ճեպազրույցների ժամանակ «Հայելի» ակումբի վրա հարձակման վերաբերյալ հարցին ի պատասխան, իր կարծիքն ասաց «Իմ քայլը» դաշինքի պատգամավոր. ԱԺ պետաիրավական հարցերի հանձնաժողովի նախագահ Վլադիմիր Վարդանյանը:
Աշոտ ՀԱԿՈԲՅԱՆ
