Այսօր Երեւանի ընդհանուր իրավասության դատարանում (Շենգավիթի նստավայր) ՀՀ երկրորդ նախագահ Ռոբերտ Քոչարյանի եւ մյուսների գործով հերթական նիստն էր: Ռոբերտ Քոչարյանի փաստաբանական թիմը ինքնաբացարկի միջնորդություն ներկայացրեց Աննա Դանիբեկյանին:
Գործով անցնում է նաեւ ՊՆ նախկին նախարար Սեյրան Օհանյանը, որը եկել էր դատարան՝ մասնակցելու նիստին:
Լրագրողների հետ զրույցում հարցին, թե ճի՞շտ է, որ ձեր ոտքի համար բուժման պիտի գնաք Գերմանիա, Սեյրան Օհանյանը պատասխանեց, որ իր ոտքի պրոթեզը երկու տարին մեկ պետք է սպասարկվի, ընդ որում, սպասարկվում է Գերմանիայում:
Կարդացեք նաև
Նա ասաց, որ Մոսկվայում այդ ընկերության մասնաճյուղերը չեն կարող դա իրականացնել, ուստի կմեկնի Գերմանիա. «Մի քանի օրով կմեկնեմ, հետ կվերադառնամ: Գնալու եմ Գերմանիայի դեսպանատուն, կարծում եմ, այն փաստաթուղթը, որը ես ներկայացրել եմ, թույլտվություն կլինի»:
Հիշեցնենք, որ Օհանյանին մեղադրանք էր առաջադրվել Մարտի 1-ի գործով եւ նրա նկատմամբ ընտրվել էր չհեռանալու մասին խափանման միջոցը:
Հռիփսիմե ՋԵԲԵՋՅԱՆ
