«Սա ՏՏ ոլորտի կարեւորագույն միջոցառումներից է, որը անցկացվում է ՀՀ-ում: Կառավարությունը, ՏՏ ոլորտը հռչակելով առաջնահերթություն, փաստում է, որ բարձր տեխնոլոգիաները պետք է ներմուծվեն տարբեր ոլորտներ՝ արդարադատություն, պետական կառավարում, տնտեսություն: Մենք նպաստելու ենք, որ դա տեղի ունենա»,-WCIT 2019-ի ընթացքում այսօր լրագրողների հետ ճեպազրույցում հայտարարեց ՀՀ փոխվարչապետ Տիգրան Ավինյանը: Նա տեղեկացրեց, որ վերջին ութ տարում ՀՀ-ում ՏՏ ոլորտը աճել է միջինը 28%-ով:
Ավինյանի խոսքով՝ WCIT 2019-ը բավականին հեղինակավոր իրադարձություն է. «ՏՏ ոլորտում հնարավորություններն անսահմանափակ են նաեւ ՀՀ-ում: Ամենակարեւորը, որ հնարավոր է քաղել այս միջոցառումից, կապերն են: Համոզված եմ, որ շատ ընկերություններ կհետաքրքրվեն ՀՀ-ում ներդրումներ անելով: Իսկ մեր տնային աշխատանքը կրթական համակարգի խորքային բարեփոխումները պետք է լինեն: Դպրոցներում կոդավորումը պետք է սկսել սովորել փոքր տարիքից»:
Փոխվարչապետը հավելեց, որ այս տարի հավելյալ ֆինանսներ են հատկացվել դպրոցներում ինժեներական լաբորատորիաների ստեղծման համար. «Դպրոցների 50%-ում դրանք կլինեն»:
Լուիզա ՍՈՒՔԻԱՍՅԱՆ
