Ավելի հեշտ եւ արագ պատրաստվող թխվածք դժվար է պատկերացնել: Այնքան արագ եւ այնքան քիչ ջանքեր պահանջող, բայց միեւնույն ժամանակ այնքան համեղ թխվածք է, որ կդառնա ձեր խոհանոցի մշտական հյուրը: Անհրաժեշտ է ընդամենը երեք բաղադրիչ՝ շերտավոր խմոր, շոկոլադ եւ ձու: Ընդհանրապես, խորհուրդ եմ տալիս սառցարանում մշտապես ունենալ 1-2 գունդ շերտավոր խմոր՝ հրատապ դեպքերի համար: Պետք եղած ժամանակ 2 ժամ առաջ կարող եք հանել սառցախցիկից եւ պատրաստել այս խմորեղենը:
Անհրաժեշտ մթերքները
Շերտավոր խմոր- 250 գրամ
Սեւ շոկոլադի սալիկ (եթե կաթնային եք սիրում, կարող եք կաթնային վերցնել)- 100 գրամ
Կարդացեք նաև
Ձու- 1 հատ
Նուշի փաթիլներ- 1 ճաշի գդալ (պարտադիր չէ)
Պատրաստման եղանակը
Սառցախցիկից 2 ժամ առաջ հանեք շերտավոր խմորը, այն պետք է լինի լավ սառը, դժվարությամբ գրտնակվի, սակայն սառած չլինի: 1 գունդ շերտավոր խմորը սովորաբար կշռում է 500 գրամ, դա նշանակում է, որ պետք է վերցնեք կես գունդ: Կամ, եթե ցանկանում եք, կարող եք պատրաստել 2 կարկանդակ: Մեկ այլ տարբերակն էլ այն է, որ մի կեսով պատրաստեք այս շոկոլադե կարկանդակից, մյուս 250 գրամով՝ որեւէ այլ բան, օրինակ, շոկոլադի փոխարեն պանրի միջուկ դրեք:
Շերտավոր խմորը գրտնակեք, որպեսզի ստացվի ուղղանկյուն շերտ, որն իր մակերեսով մեծ է շոկոլադի սալիկից: Շոկոլադի սալիկը դրեք կենտրոնում: Խմորի՝ դուրս մնացած մասերը կտրեք լուսանկարում ցուցադրված ձեւով: Վերեւի եւ ներքեւի շերտերը ծալեք ներս, իսկ կողքի շերտերով «հյուսեք» շոկոլադի սալիկը:
Վրան քսեք լավ հարած ձուն, եթե ունեք նուշի փաթիլներ, ցանեք վրան, եթե՝ ոչ: Դրեք 220 աստիճան տաքացրած ջեռոցը մոտ 20 րոպեով, մինչեւ խմորը բարձրանա եւ շառագունի:
Անջատեք ջեռոցը, թողեք 5-8 րոպե թխվածքը սառչի, ապա կտրատեք եւ մատուցեք: Կարող եք մատուցելիս կողքը պաղպաղակ դնել:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
