Հոկտեմբերի 4-ին Մոսկվա կինոթատրոնում տեղի ունեցավ «Իմ խաչը» գեղարվեստական ֆիլմի պրեմիերան: «Իմ խաչը» պատմում է 1991-1992 թվականների ղարաբաղյան պատերազմի մասին: Ֆիլմը հիմնված է իրական փաստերի վրա:
Գլխավոր դերակատարներն են Նարինե Գրիգորյանը և Երո Մուրյանը: Ֆիլմը պատմում է վրիժառու դարձած արցախցի կնոջ՝ Սոնայի և բժշկական առաքելությամբ Բաքու ժամանած բժիշկ Ժակի մասին:
Ֆիլմի պրոդյուսեր Հրաչյա Մեսրոպյանը մեզ հետ զրույցում ասաց, որ 2014 թվականից եղել է գաղափարը և երկար ու ծանր աշխատանքներից հետո այն նկարահանվել է.
«Դերասանական կազմի ընտրությունը դժվար էր, քանի որ ֆիլմը հիմնված է իրական փաստերի վրա և կային հերոսների նախատիպերը, հետևաբար պետք է ընտրեինք այնպիսի դերասաններ, որոնք նման են կերպարներին»։
Կարդացեք նաև
Գլխավոր դերակատար Երո Մուրյանը Ֆրանսիայից Հայաստան է եկել այս ֆիլմի համար: Դերասանը խոստովանում է, որ այս դերը իր համար տարբերվող էր, նրան հատկապես հետաքրքրել են իր կերպարի ներքին խնդիրները: Նա խոսեց նաև իր ունեցած դժվարությունների մասին.
«Միակ դժվարությունը ռուսերենի հետ էր կապված: Ժակը Ֆրանսիայից ժամանած բժիշկ է, ով խոսում է ռուսերեն, բնականաբար ֆրանսիական ակցենտով: Սցենարը ի սկզբանե գրվել է մաքուր ռուսերենով և որպեսզի խոսելաոճը համապատասխան լինի հերոսին, ռուսերեն դիալոգները թարգմանվել են ֆրանսերեն, ֆրանսերենից ռուսերեն: Բժշկի կերպարին ավելի համապատասխան լինելու համար հիվանդանոցում պրակտիկա եմ անցել»:
Ֆիլմում տեղ են գտել ռեժիսորի՝ Շավարշ Վարդանյանի անձնական արխիվից կադրեր, որոնք նախկինում որևէ տեղ չեն հրապարակվել.
«Այդ տարիներին ես եղել եմ Արցախում և մասնակցել եմ պատերազմին ոչ թե զենքով, այլ տեսախցիկով, որպեսզի սերունդներին փոխանցվի այդ ամենը: Այդ նկարահանած նյութերի հիման վրա 5-6 դոկումենտալ ֆիլմ եմ նկարել, բայց հետո միտք առաջացավ խաղարկային ֆիլմ նկարահանելու»:
Ֆիլմի կոմպոզիտորը Հայկոն է, որը նշեց, որ այսպիսի ֆիլմերը իրեն շատ հոգեհարազատ են և հաճույքով է աշխատում.
«Այս ֆորմատով արդեն 3-րդ ֆիլմն է, որի երաժշտությամբ զբաղվում եմ ես: Առաջինը եղել է «Մի վախեցիր»-ը, երկրորդը՝ «Գարեգին Նժդեհը» և երրորդը՝ «Իմ խաչը»: Ամեն անգամ չեմ հավատում, որ կկարողանամ գործը գլուխ բերել և շուրջ 1 ամիս մտածում եմ՝ ինչ կարելի է անել: Այս ֆիլմի երաժշտության վրա աշխատել ենք 1 տարի»:
Ֆիլմը ունի նաև սաունդթրեք, որը կոչվում է «Վերադարձ»: Երաժշտության հեղինակն է Րաֆֆի Ալթունյանը, իսկ խոսքերի հեղինակը Արթուր Սաֆարյանն է: Երգը կատարում է Լիլիթ Մռավյանը:
«Իմ խաչը»-ում հանդես են եկել դերասաններ Շանթ Հովհաննիսյանը, Սարգիս Գրիգորյանը, Հովակ Գալոյանը, Անի Խաչիկյանը, Գնել Ուլիխանյանը և այլք:
Ֆիլմի ստեղծագործական կազմը նշեց նաև, որ պլաններ կան մասնակցելու միջազգային փառատոններին:
Գառնի ՄՈՒԹԱՖՅԱՆ
