«Ես արդար մարդ եմ ու կարդարացվեմ»,-լրագրողների հետ զրույցում այսօր նման համոզմունք հայտնեց նախկին փոխոստիկանապետ Լեւոն Երանոսյանը: Հիշեցնենք՝ նա մեղադրվում է 2018թ.-ին 2 դեպքով «Զարյա» տեսակի լուսաձայնային նռնակներ կիրառելու եւ այդ կերպ պաշտոնեական լիազորություններն անցնելու համար: «Երբ դատական գործընթացը սկսվի, ես կխոսեմ: Հիմա ոչ մի բանի համար չեմ խոսելու»,-հայտարարեց Երանոսյանը:
ՀՀ նախկին ոստիկանապետ Հայկ Հարությունյանի ինքնասպանության վարկածի առնչությամբ էլ կարծիք չհայտնեց ու ասաց, որ ճանաչել է Հարությունյանին: «Շատ լավ մարդ ու գեներալ էր»,-ասաց Երանոսյանը:
Լրագրողները նաեւ հետաքրքրվեցին, թե Երանոսյանն այժմ ինչով է զբաղվում: «Թոշակառու եմ, ինչո՞վ եմ զբաղվում»,-ծիծաղով ասաց նախկին պաշտոնյան, ապա «օրինակ՝ ինչո՞վ, այգի եք խնամո՞ւմ» հարցին ի պատասխան ժպտալով հավելեց,-«այո, այգի եմ խնամում»: Ինչ վերաբերում է Վալերի Օսիպյանի՝ ՀՀ ոստիկանապետի պաշտոնից հրաժարականին, Երանոսյանը չմեկնաբանեց, ասելով, որ քաղաքականությամբ չի զբաղվում:
Լուիզա ՍՈՒՔԻԱՍՅԱՆ
Կարդացեք նաև
