«Հակամարտության պատմության բոլոր փուլերում էլ կարգավորման գործընթացից տեղյակ արտերկրի գրեթե բոլոր քաղաքական գործիչները չէին էլ կասկածում, որ խաղաղ լուծման տարբերակի վերջնարդյունքը հենց Արցախի Հանրապետության հայկական լինելու մեջ է: Սակայն դա միջազգայնորեն ամրագրելու համար դեռևս պետք է ճանապարհ անցնել: Պատերազմը՝ ինչպիսին էլ այն լինի, միևնույն է հարցի լուծում չէ: Հետևաբար խաղաղ կարգավորման բանակցություններում պետք է ջանքեր գործադրել պահպանել ու զարգացնել ձեռքբերվածը: Ինքնորոշման իրավունքի սկզբունքը վաղուց ճանաչվել է ԵԱՀԿ ՄԽ համանախագահող երկրների ղեկավարների բոլոր համատեղ հայտարարություններում, և դրա մասին է պետք անընդհատ խոսել»,- մեր՝ ինչպե՞ս եք գնահատում Ադրբեջանի նախագահի պատասխանը`ՀՀ վարչապետի հայտարարությանը`«Արցախը Հայաստանն է եւ վերջ» հարցին ի պատասխան ասաց, ՀՀ ԱԺ արտաքին հարաբերությունների հանձնաժողովի նախկին նախագահ Արտակ Զաքարյանը:
Ըստ նրա, Ալիևի հայտարարությունը թե «Ղարաբաղը Ադրբեջան է» նույնքան խորհրդանշական է, որքան Փաշինյանի հայտարարությունը Ստեփանակերտում: Փաշինյանի պացիֆիստական մոտեցումները՝ թե հիմնախնդրի լուծումը պետք է նաև ադրբեջանցիների համար ընդունելի լինի, Ադրբեջանում չեն գնահատում և համարժեք չեն արձագանքում: Ընդհակառակը՝ էլ ավելի հաճախ են սկսել խոսել ռազմական ճանապարհի մասին:
«Մեր տարածաշրջանը կրկին բարդ հարաբերությունների մեջ է ընկղմվում, որտեղ կրկին խաչվելու են աշխարհաքաղաքական շահերը: ՌԴ, ԱՄՆ, Ֆրանսիա և Իրան: Ահա այս երկրների հետ ակտիվ, հասկանալի, հավասարակշռված ու կառուցողական հարաբերություններում է Արցախյան հարցի խաղաղ կարգավորման բանալին: Անհրաժեշտ է հաշվարկված ու ծրագրված քաղաքականություն տանել, ոչ թե սպոնտան գործողություններ իրականացնել: Այլապես հակամարտության կողմերից հնչող ցանկացած հայտարարություն մյուս կողմերից անարձագանք չի մնալու», կարծում է Արտակ Զաքարյանը:
Նելլի ԳՐԻԳՈՐՅԱՆ
