Ալիեւը պատասխանել էր վարչապետ Նիկոլ Փաշինյանի՝ Արցախը Հայաստան է հայտարարությանը եւ ասել, որ դա սուտ է, «Ղարաբաղը Ադրբեջան է»:
Այսօր լրագրողների հետ զրույցում ԱԺ արտաքին հարաբերությունների հանձնաժողովի նախագահ Ռուբեն Ռուբինյանն ասաց, որ Ալիեւի պատասխանից եւս մեկ անգամ երեւում է, որ ի տարբերություն հայկական կողմի, Ադրբեջանը կառուցողական չէ եւ չի ուզում խաղաղ կարգավորում, հարցի հանգուցալուծում. «Ինչ էր ՀՀ վարչապետի ասածը, որ կա հակամարտություն եւ այդ հակամարտությունը կարող է ունենալ միայն խաղաղ հանգուցալուծում, եւ եթե մենք ուզում ենք հասնել խաղաղ հանգուցալուծման, անհրաժեշտ է, որ ե՛ւ Հայաստանի ժողովուրդը, ե՛ւ Արցախի ժողովուրդը, ե՛ւ Ադրբեջանի ժողովուրդը համաձայն լինեն այդ հարցի հանգուցալուծման շուրջ: Նա ակնկալում էր, որ մյուս կողմն ընդունի այս փաստը, քանի որ անհնար է որեւիցե հանգուցալուծում՝ առանց կողմերի համաձայնության: Իսկ Ալիեւի պատասխանը ցույց է տալիս, որ նա չի ընդունում այդ բանաձեւը, հետեւաբար, չի ուզում հակամարտության խաղաղ հանգուցալուծում»:
Հարցին՝ սահմանին զոհ ունենք, վիրավոր ունենք, սա չի խոսո՞ւմ այն մասին, որ խնդիրը տեղից չի շարժվում եւ Նիկոլ Փաշինյանի առաջարկած բանաձեւը կենսունակ չէ՝ Ռուբինյանը պատասխանեց. «Սա խոսում է այն մասին, որ կա բանաձեւ, որը, ըստ էության, հակամարտության հանգուցալուծման միակ բանաձեւն է եւ Ադրբեջանը չի ընդունում այդ բանաձեւը, շարունակում է իր ռազմատենչ հայտարարությունները, իր ագրեսիվ գործողությունները, եւ աշխարհը դա տեսնում է»:
Հարցին՝ ՌԴ նախագահ Վլադիմիր Պուտինը ՀՀ-ից մեկնելուց հետո հանդիպել է նաեւ Ալիեւի հետ, դա ազդա՞կ է, ինչպե՞ս եք մեկնաբանում՝ Ռուբեն Ռուբինյանը պատասխանեց. «Տարբեր երկրների ղեկավարներ պարբերաբար հանդիպում են տարբեր երկրների ղեկավարների հետ, ես մեկնաբանելու բան չունեմ այս առումով»:
Կարդացեք նաև
Հռիփսիմե ՋԵԲԵՋՅԱՆ
