«Մարդկային զարգացման միջազգային կենտրոնի» ղեկավար Թեւան Պողոսյանի կարծիքով, ԱԺ-ում մեկնարկած ՍԴ նախագահ Հրայր Թովմասյանի հեռացման գործընթացն այդ տեսակի ճանապարհով գնալու առաջին փորձն է մեզանում: «Այնպես որ, կարող է այդ ճանապարհին քաղաքական խոսքի մեջ լինեն նախադասություններ, որոնք կընկալվեն քաղաքական, լինեն նախադասություններ, որոնք կընկալվեն իրավական: Այնուամենայնիվ, եթե այդ փաստաթուղթն ընդունվեց, գնալու է Սահմանադրական դատարան, որտեղ, հուսով եմ, սահմանադրական դատարանի դատավորները կկայացնեն իրավական լուծում: Եվ մենք մեր պատմության մեջ կունենանք այս ինստիտուտի առաջին փորձը եւ դրա հիման վրա դասեր կքաղենք ապագայում՝ եթե պետք լինի:
Այսպիսի խնդիրներից ոչ թե պետք է վախենալ, այլ անցնել: Սա ժողովրդավարական ճանապարհն է, եւ մենք պետք է կարողանանք այս բոլոր սահմանադրական ինստիտուտները, որոնք ամրագրված են սահմանադրությամբ եւ մնացած օրենքներով, ժամանակ առ ժամանակ փորձարկել, հասկանալ՝ ճիշտ մոտեցում է եղել կամ ոչ»:
Աշոտ ՀԱԿՈԲՅԱՆ
