«Մենք իրավական պետության համար պայքարը շփոթել ենք անձնական պայքարի հետ: Եվ անձնական մակարդակի պայքարն ուղեկցվում է բարեկրթության հետ ոչ մի առնչություն չունեցող ձեւերով», – Անդրանիկ Քոչարյանի՝ Արփինե Հովհաննիսյանին վիրավորելու եւ ներողություն խնդրելու մտադրություն չունենալու առիթով Aravot.am-ին ասաց «Ժառանգություն» կուսակցության փոխնախագահ Նարինե Դիլբարյանը:
«Ցավում եմ հենց պարոն Անդրանիկ Քոչարյանի համար, նաեւ՝ Հայաստանի Հանրապետության: Ճանապարհին տեսա Ֆրանսիայի դեսպանի գրառումը, որով նա եւս արձագանքել էր այս երեւույթին՝ նշելով անթույլատրելիությունը կանանց եւ քաղաքական պայքարում նման արտահայտությունների մասին: Ինձ թվում է՝ պետք է պետական մակարդակով մտածել, թե ինչպես անել, որպեսզի մարդկանց այդ կործանարար էներգիան պարպվի ավելի անվտանգ ասպարեզներում: Որպես Հայաստանի Հանրապետության քաղաքացի, իմ կողմից հայցում եմ Արփինե Հովհաննիսյանի ներողամտությունը», – ասաց Նարինե Դիլբարյանը:
Աշոտ ՀԱԿՈԲՅԱՆ
