Վերջերս համացանցում տեղեկություն տարածվեց, թե Ուկրաինայի նախագահ Վլադիմիր Զելենսկին իր երկրի քաղաքացիներին հորդորել է Արցախ մեկնելիս առաջնորդվել Ադրբեջանի օրենքներով:
Այսօր Aravot.am-ը Հայաստանում Ուկրաինայի նախկին դեսպան Ալեքսանդր Բոժկոյին խնդրեց մեկնաբանել տեղի ունեցածը: «Նման բան չի եղել: Ուկրաինայի արտգործնախարարության հայտարարություն է եղել՝ ուղղված այն քաղաքացիներին, որոնք պատրաստվում են գնալ Հյուսիսային Օսեթիա, Աբխազիա, այդ թվում՝ Լեռնային Ղարաբաղ: Այսինքն, ոչ ճանաչված հանրապետություններ: Դուք գիտեք, թե ինչպես են Ադրբեջանը, Վրաստանը վարվում այդ քաղաքացիների նկատմամբ: Գիտեք չէ՞՝ բռնում են, վերցնում են անձնագրերը եւ այլն: Դա ընդամենը զգուշացում, խորհուրդ է եղել ԱԳՆ-ի կողմից, որպեսզի մեկնելուց առաջ մտածեն, թե ինչ կարող է լինել իրենց հետ», – ասաց նախկին դեսպանը:
Հիշեցնենք, Ուկրաինայի արտաքին գործերի նախարարությունը հայտարարություն էր տարածել Արցախ, Աբխազիա և Հարավային Օսիա այցելությունների կարգի մասին։ Կիևը զգուշացրել էր իր քաղաքացիներին, հիշյալ տարածքներ այցելելիս, առաջնորդվել Ադրբեջանի և Վրաստանի օրենսդրությամբ։ «Այդ օրենսդրության խախտումը ենթադրում է վարչական և քրեական պատասխանատվություն», – մասնավորապես ասված էր Ուկրաինայի ԱԳՆ տարածած հաղորդագրությունում։
Տարածված հայտարարությունը շփոթություն էր առաջացրել ինչպես լրատվամիջոցների, այնպես էլ ընթերցողների շրջանում։ Մասնավորապես՝ կարծիք էր ստեղծվել, թե Ուկրաինան արգելել է իր քաղաքացիներին Արցախ այցելել՝ վարչական / քրեական պատասխանատվության սպառնալիքով։
Կարդացեք նաև
Արտաքին գործերի նախարարությունը, անդրադառնալով այս հարցին, նշել էր, որ Ուկրաինայի ԱԳՆ-ն հղում է անում Ադրբեջանի և Վրաստանի օրենսդրությանը, այլ ոչ թե Ուկրաինայի։ Արցախ այցելելու համար Ուկրաինայի քաղաքացիներին այդ երկրի օրենսդրությամբ վարչական կամ քրեական պատասխանատվություն չի սպառնում։
Աշոտ ՀԱԿՈԲՅԱՆ
