Խորհրդարանն այսօր առաջին ընթերցմամբ ընդունեց «Պետական գույքի մասնավորեցման 2017-2020 թվականների ծրագրի մասին» Հայաստանի Հանրապետության օրենքում փոփոխություն կատարելու մասին նախագիծը: Նախագծի հեղինակը «Իմ քայլը» խմբակցության պատգամավոր Նարեկ Զեյնալյանն է: Հեղինակն առաջարկում էր «Մաշկաբանության եւ սեռավարակաբանության բժշկագիտական կենտրոն» ՓԲԸ-ն հանել մասնավորեցման ցանկից: Գլխադասային հանձնաժողովում կառավարության տեսակետը ներկայացնող պաշտոնյաները դեմ էին արտահայտվում պատգամավորի նախաձեռնությանը: Նախագիծն ընդունվեց 71 կողմ, 4 դեմ և 22 ձեռնպահ ձայներով:
«Իմ քայլը» խմբակցության ղեկավար Լիլիթ Մակունցը մինչ քվեարկությունը հայտարարեց, որ իրենց խմբակցությունն այս նախագծին քվեարկելու է ազատ:
Այժմ խորհրդարանում քննարկվում է կառավարության բացասական եզրակացությանն արժանացած «Իմ քայլը» խմբակցության պատգամավորներ Վարազդատ Կարապետյանի, Արտակ Մանուկյանի եւ Բաբկեն Թունյանի առաջարկը` Հարկային օրենսգրքում փոփոխություններ եւ լրացումներ կատարելու մասին: Նախագծով հարկային արտոնություններ են սահմանվում բրոկերային գործունեության մասով:
Ըստ հարցը ներկայացնող Արտակ Մանուկյանի, նախագծի նախնական առավելագույն բացասական ազդեցությունը 60 միլիոն դրամ է: Այսինքն, նախագծի ընդունման արդյունքում այդքան է կազմելու բյուջեի կորուստը: Բայց նկատի ունենալով ներկայիս իշխանության նկատմամբ բարձր վստահությունը, նախագծի հեղինակները կարծում են, որ նման փոքր, բայց կարեւոր քայլերով գնալ առավել համակարգային փոփոխությունների:
Կարդացեք նաև
Գլխադասային հանձնաժողովը, հիշեցնենք, դրական եզրակացություն է տվել նախագծին:
Նելլի ԳՐԻԳՈՐՅԱՆ
