Ինչպես ավելի վաղ հայտնել էինք, ԱԺ-ն այսօր քննարկում է պատգամավորներ Ալեն Սիմոնյանի, Նաիրա Զոհրաբյանի եւ Սիփան Փաշինյանի մշակած՝ «Վիճակախաղերի մասին» օրենքը երկրորդ ընթերցմամբ եւ ամբողջությամբ ընդունելու հարցը:
Օրինագծում փոփոխություն է եղել, ըստ որի՝ 2020թ.-ի նոյեմբերի մեկից Երեւանի ամեն վարչական շրջանում կարող է գործել միայն մեկ բուքմեյքերական գրասենյակ: «Սա հեշտ չի լինելու, մի քիչ նեղսրտած եմ. կարծում եմ՝ ինչ խոստացել ենք, չենք անում»,-մտահոգություն հայտնեց «Իմ քայլի» պատգամավոր Սիսակ Գաբրիելյանը:
«Խոստացել էինք բուքմեյքերական գրասենյակները փակել, բայց բուքմեյքերական գործող չորս ընկերություն կա, այսինքն՝ Երեւանում քառասուն գրասենյակ կգործի: Դա էլ է բավական, որ մարդիկ տուն-տեղը կրվեն, ընտանիքները քանդվեն, ուստի պարոն Սիմոնյան, մտածեք, այդ ընկերությունները կարող են մասնատվել եւ էլի գրասենյակներ բացել»,-նկատեց Սիսակ Գաբրիելյանը:
Ալեն Սիմոնյանը պարզաբանեց. «Որպեսզի կազմակերպությունը գրանցվի, շատ մեծ ծախսեր են պետք: Նոր լիցենզիան շատ ծախսատար է, իսկ դուստր ձեռնարկություն գրանցելու իրավունք բուքմեյքերական կազմակերպությունը չի ունենալու: Այս օրենքն 80 տոկոսով կրճատելու է բուքմեյքերական գրասենյակների թիվը»:
Կարդացեք նաև
Արձագանքեց նաեւ «Իմ քայլի» պատգամավոր Բաբկեն Թունյանը՝ ասելով, որ քանի դեռ առցանց հարթակում խաղամոլության դեմն առնելու լուծումը չեն գտել, մեկ զարկով միանգամից ամեն ինչ արգելել հնարավոր չէ:
Լուիզա ՍՈՒՔԻԱՍՅԱՆ
