Վերջերս Ռիգայի Սուրբ Հովհաննեսի տաճարում տեղի ունեցավ Կոմիտասի Պատարագի կատարումը Լատվիայի ռադիոյի պետական երգչախմբի մեկնաբանմամբ, խմբավար Սիգվարդս Կլայավայի ղեկավարությամբ: Հնչել է ստեղծագործության նոր տարբերակը, որը պատրաստել է կոմպոզիտոր Վաչե Շարաֆյանը խառը երգչախմբի համար:
«Առավոտի» հետ զրույցում կոմպոզիտորը նշեց, որ Պատարագի այդ տարբերակի հիմքում արական երգչախմբի համար Կոմիտասի ստեղծած բնագիրն է: «Ձգտել եմ առավելագույնս հարազատ մնալ բնագրին, թեպետ հնչողությունը համեմել եմ գունային համեմունքներով՝ ելնելով, իհարկե, խառը երգչախմբի ձայնատարության օրինաչափություններից: Որպես մենակատարներ հանդես եկան օպերային թատրոնի մեներգիչներ Հովհաննես Ներսեսյանը (բաս), Արմեն Բադալյանը (տենոր) եւ երգչախմբի արտիստներից: Որպես խորհրդատու Ֆրանսիայից հրավիրված էր երգիչ խմբավար Մկրտիչ Մկրտչյանը: Կոմիտասյան այս երկը ձայնագրվել է եւ առաջիկայում կհրատարակվի CD»,- հայտնեց Վաչե Շարաֆյանը:
Մեր զրուցակիցը տեղեկացրեց, որ Պատարագի պրեմիերայից առաջ Էստոնիայում, հեղինակավոր Արվո Պյարտի անվան կենտրոնում կայացել է եւս մի համերգ՝ նվիրված Կոմիտասին, ներկայացվել է իր «Ստաբաթ Մատերը» մեցցո սոպրանո Իրիս Օյայի եւ Գրեմմիի մրցանակակիր, Էստոնիայի պետական արական երգչախմբի կատարմամբ՝ Միկ Ուելոյայի ղեկավարությամբ: Մենք անդրադարձել ենք այս ստեղծագործությանը, որը կոմպոզիտորը գրել է 2 տարի առաջ՝ հենց այդ երգչախմբի պատվերով: Եթե չենք սխալվում, «Ստաբաթ Մատերին» հաճախ է անդրադառնում երգչախումբը:
Ռիգայի Սուրբ Հովհաննեսի տաճարում Կոմիտաս է հնչում
Զրույցի ընթացքում կոմպոզիտորը հավաստիացրեց, որ բացի կոմիտասյան միջոցառումներից, վերջին տարիներին Մերձբալթյան երկրներում գրեթե ամեն օր անցկացվում են հայ մշակույթի հետ կապված տարբեր միջոցառումներ, եւ գրեթե բոլորի նախաձեռնողը Մերձբալթյան երկրներում ՀՀ-ի դեսպան Տիգրան Մկրտչյանն է: «Մերձբալթյան երկրներում ունենալով ոչ մեծ համայնք, ունենք իսկապես բարձրագույն որակ՝ հաստատագրված լուրջ մշակութային քաղաքականությամբ: Մեր հայրենակիցներից շատերը գուցե տեղեկացված չլինեն, որ օրինակ, Ռիգայում գործում է նորակառույց հայկական եկեղեցի, որի հովվապետն է տեր Խոսրով քահանան, ում նախնիներից է Ղազարոս Աղայանը եւ ուղղափառ եկեղեցու վարդապետ, փիլիսոփա, պոետ Պավել Ֆլորենսկին»:
Կարդացեք նաև
ՌԴ քաղաքներում, Մերձբալթյան երկրներում, ԱՄՆ-ում, եվրոպական քաղաքներում հաճախակի կատարվող կոմպոզիտորից՝ Շարաֆյանից, հետաքրքրվեցինք ըստ Լեւոն Շանթի իր «Հին աստվածներ» բալետով, որը բեմադրվելու է Ազգային օպերային թատրոնում: «Բեմադրության պատրաստման աշխատանքները նոր-նոր սկսում ենք, ահռելի աշխատատար ընթացք է այն ակնկալում, ստեղծված է բարձրակարգ մասնագետների հիանալի թիմ: Պրեմիերան հավանաբար կկայանա 2020թ. փետրվարին: Բեմադրության իրականացմանն անհրաժեշտ միջոցների հիմնական մասը տրամադրել է կրթության, գիտության, մշակույթի եւ սպորտի նախարարությունը»,- առանց մանրամասնելու ասաց կոմպոզիտորը:
Սամվել ԴԱՆԻԵԼՅԱՆ
Գլխավոր լուսանկարում՝ Հովհաննես Ներսիսյանը, Վաչե Շարաֆյանը, Տիգրան Մկրտչյանն ու Արմեն Բադալյանը
«Առավոտ» օրաթերթ
01.10.2019
