«Ուրախ եմ, որ ինձ պատմական հնարավորություն է տրված մասնակցելու այս նիստին՝ այս գեղեցիկ եւ պատմական քաղաք Երեւանում: Ի սրտե շնորհակալ եմ Նիկոլ Փաշինյանին՝ այս կարեւոր իրադարձության կազմակերպման եւ արժանի հյուրընկալության համար»,-Երեւանում այսօր ընթացող Եվրասիական տնտեսական բարձրագույն խորհրդի նիստում հայտարարեց Իրանի նախագահ Հասան Ռոհանին: Նա շեշտեց, որ միջազգային պարտավորությունների շրջանակում պետությունները պետք է աջակցեն խաղաղության եւ անվտանգության պահպանմանը:
«ԱՄՆ-ի թշնամական եւ միակողմանի մոտեցումները հանգեցրին Իրանի հանդեպ կոշտ պատժամիջոցների: Վերջին տարիներին ԱՄՆ-ն միակողմանի մոտեցումներ է ցուցաբերում՝ հաշվի չառնելով միջազգային պարտավորությունները եւ համաձայնագրերը, խախտելով երկկողմանի համաձայնագրերը: Մենք կարծում ենք, որ միջազգային հանրությունը պետք է հակազդի ԱՄՆ-ի այս թշնամական եւ միակողմանի մոտեցմանը՝ կայացնելով լուրջ որոշումներ եւ արդյունավետ գործողություններ»,-համոզմունք հայտնեց Իրանի նախագահը:
Հիշեցնենք, որ հոկտեմբերի վերջից ուժի մեջ է մտնելու Իրան-ԵՏՄ ազատ առեւտրի գոտու մասին համաձայնագիրը: Դառնալով դրան՝ Ռոհանին նշեց, որ Իրանը պատրաստ է տրամադրել իր բոլոր հնարավորությունները՝ համաձայնագրի շրջանակում կյանքի կոչվելիք առեւտրային գործառույթների համար. «Պատրաստ ենք ընդունել ԵՏՄ անդամ-երկրների ներդրողներին»:
Կարդացեք նաև
Լուիզա ՍՈՒՔԻԱՍՅԱՆ
