Gazeta.ru կայքն անդրադարձել է լեգենդար շանսոնյե Շառ Ազնավուրի (Շահնուր Վաղինակ Ազնավուրյան) մահվան տարելիցին՝ «Մեկ տարի առանց Շառլ Ազնավուրի» խորագրով հոդվածում:
«Շառլ Ազնավուրը ծնվել է Փարիզում՝ հայերի ընտանիքում: Լինելով Էդիթ Պիաֆի աշակերտը՝ նա ելույթ է ունեցել հինգ տարեկանից, իսկ 24 տարեկանում աշխարհահռչակ երգչուհու հետ մեկնել է շրջագայության Միացյալ Նահանգներ: 50-ականներին շանսոնյեի համերգները մեծ պահանջարկ ունեին և նա դարձավ հայտնի աշխարհով մեկ: Արդեն 1956թ. նա շաբաթներ շարունակ ամեն օր՝ օրական երեք անգամ, ելույթ էր ունենում Փարիզի «Օլիմպիա» համերգասրահում: Այնուհետև սկսվեց համատեղ աշխատանք Ֆրենկ Սինատրայի, Ռեյ Չարզլի, Բոբ Դիլանի, Խուլիո Իգլեսիասի և այլ աշխարհահռչակ աստղերի հետ: Ազնավուրը խաղացել է շուրջ 60 դեր և աշխատել այնպիսի հռչակավոր ռեժիսորների հետ, ինչպիսիք են Ֆրանսուա Տրյուֆոն, Կլոդ Շաբրոլը, Ժան Կոկտոն, Կլոդ Լելուշը:
1975թ. Ազնավուրը գրել է «Նրանք ընկան» (Ils sont tombés) երգը՝ նվիրված Հայոց ցեղասպանության զոհերի հիշատակին: Նա մի շարք երգեր ունի Հայաստանին նվիրված, իսկ 1988թ. շանսոնյեն դրամահավաք է կազմակերպել՝ հաջակցություն Սպիտակի երկրաշարժից տուժածներին: 2008թ. ՀՀ նախագահ Սերժ Սարգսյանը ստորագրել է Շառլ Ազնավուրին քաղաքացիություն շնորհելու հրաման:
Շառ Ազնավուրը վախճանվել է 2018թ. հոկտեմբերի 1-ին, նրան հուղարկավորել են Փարիզում՝ ընտանեկան գերեզմանատանը, հուղարկավորության օրը Հայաստանում հայտարարվել էր սգո օր»,-գրում է Gazeta-ն:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
