Արարատի մարզի Նորաշեն համայնքի բնակիչները մարզպետ Գարիկ Սարգսյանի հիմնավորումները՝ Նորայր Գրիգորյանին պաշտոնից ազատելու, «անհիմն ու անօրինական» համարեցին, երբ մարզպետ Սարգսյանը դուրս գալով աշխատասենյակից, որոշ բացատրություններ ներկայացրեց՝ ինչո՞ւ է Նորաշենի համայնքապետի լիազորությունները դադարեցրել:
Մարզպետի ընդունարանի առաջ այսօր առավոտից բողոքի ցույց են անում Նորաշենի մի խումբ բնակիչներ, որոնք պահանջում են վերականգնել իրենց նախկին գյուղապետին պաշտոնում:
Մեկ օր առաջ նրանք համայնքապետարանի առջեւ էին հավաքվել՝ նույն պահանջով:
Ընդունարանի առաջ նստացույց կազմակերպած նորաշենցիները մարզպետի ոչ մի պատճառաբանությանը համաձայն չէին եւ ասացին, որ չեն ցանկանում ոչ մի փաստաթուղթ տեսնել: Նրանք պնդում էին, որ իրենց նախկին գյուղապետը ոչ մի հանցանք չի գործել ոչ մի օրենք չի խախտել:
Կարդացեք նաև
Գարիկ Սարգսյանը, դուրս գալով աշխատասենյակից, ցույց տվեց իր ձեռքին եղած մի քանի որոշումները՝ նշելով, որ մեկը տարածքային կառավարման եւ ենթակառուցվածքների նախարար Սուրեն Պապիկյանի՝ իրեն հասցեագրված որոշումն է, որը փոխանցում է լրագրողներին, մյուսն՝ իր կարգադրությունը, որով նշանակել է համայնքի ղեկավարի պաշտոնակատար. «Ամեն ինչ տեղի է ունեցել օրենքի եւ իրավազորության պայմաններում»,-ասաց մարզպետը: Ի պատասխան, նորաշենցիները բղավեցին՝ էդ թղթերը մեզ պետք չեն, սուտ է:
Մարզպետը շարունակեց. «Օրենքի ուժով համայնքի ղեկավարի լիազորությունները դադարեցվել են, ավագանին ընդամենն արձանագրել է այդ փաստը, այլ մեկնաբանություններ չեմ տալիս»:
Նաեւ ասաց, որ բոլոր փաստերն ունեն՝ փաթեթով. «Համայնքում արված մեր ուսումնասիրությունները ներկայացրել ենք լիազոր մարմնին՝ Տարածքային կառավարման եւ ենթակառուցվածքների նախարարություն համակողմանի ամեն ինչ նայվել է, այլ մեկնաբանություններ այս պահին չեմ կարող տալ»:
Լուսինե ԲՈՒԴԱՂՅԱՆ
