«Հայփոստ» եւ «Էներգաիմպեքս» ընկերությունները 2017-2020 թվականների մասնավորեցման ցանկից հանելու մասին կառավարության ներկայացրած նախագծի քննարկման ժամանակ, ԲՀԿ-ական պատգամավոր Արկադի Խաչատրյանը հարցը ներկայացնող Պետական գույքի կառավարման նախագահ Նարեկ Բաբայանից հետաքրքրվեց` ի՞նչ է սպասվում «Հայփոստին»: Նա հիշեցրեց, որ ժամանակին ծրագիր կար «Հայփոստը» խոշոր բանկ դարձնելու, որը կապահովեր բոլոր գյուղերում, բոլոր ծառայությունների հասանելիություն: Բայց քանի որ այս ծրագիրը բավական մեծ ներդրում էր պահանջում, հետագայում մոտեցումը փոխվեց եւ նախագիծ էր մշակվում`առանց լիցենզիայի, օրենքի ուժով, «Հայփոստին» բանկային գործառնություններ տրամադրելու համար: Այս նախագիծն ի վերջո օրենք չդարձավ եւ ըստ պատգամավորի, շատ լավ եղավ: Բայց նա չի ընդունում մասնավորեցման ցանկից ընկերությունը հանելն այն փաստարկով, որ շրջաններում մասնաճյուղերը կփակվեն: Նա գտնում է, որ մասնավորեցման պայմանագրով կարելի է դա արգելել եւ հարցը լուծել:
«Ո՞րն է կառավարության հայեցակարգը «Հայփոստի» հետ կապված»,- պատգամավորի հարցին ի պատասխան Նարեկ Բաբայանը կրկնեց` հավատարմագրային կառավարման մրցույթ կլինի, պայմանները մշակվում են, նախատեսվում է մի շարք ծառայությունների ավելացում էլ: Պայմանները վերջնական չեն, բանկայինի մասով Նարեկ Բաբայանը հստակ նշել չի կարող, բայց վստահ է, որ մի շարք այլ ծառայություններ գյուղերում հասանելի կլինեն:
Պատգամավորը համաձայն չէ, կարծում է, որ որեւէ հավատարմագրային կառավարիչ չի կարող այդչափ ներդրումներ ապահովել եւ եթե մասնավորեցման ցանկից հանում ենք, նշանակում է խիստ եւ կտրուկ փոփոխություն է լինելու «Հայփոստի» ճակատագրում: Նարեկ Բաբայանը հստակ բան ասել չկարողացավ, միայն ասաց, որ բաժնետոմսերի պահպանումը պետության համար ռազմավարական նշանակություն ունի:
Նելլի ԳՐԻԳՈՐՅԱՆ
