«Ժողովուրդ» օրաթերթի հետ զրույցում ԲԴԽ նախագահ Ռուբեն Վարդազարյանը, անդրադառնալով այն հարցին, թե ինչպես է տեսնում դատավորների նկատմամբ ճնշումների հանգուցալուծումը, հայտնեց. «Վստահ եմ, որ միակ հանգուցալուծումը դա է։ Իշխանությունն է՛լ, ընդդիմադիր ուժերի ղեկավարներն է՛լ պետք է ասեն, որ՝ հարգելի՛ ժողովուրդ, չփորձեք դատավորին մոտենալ՝ անկախ այն բանից՝ դատավորի կայացրած ակտը ձեր դուրը եկել է, թե ոչ, չփորձեք մոտենալ մի մետրից ավելի..»:
– Պարոն Վարդազարյան, դատավոր Աննա Դանիբեկյանին հետապնդողները կալանավորվել են, դատավորի անվտանգությունը ապահովվում է։ Ըստ Ձեզ՝ սա հարցի լուծո՞ւմ է։
– Դա ընդամենը Աննա Դանիբեկյանին առնչվող իրավիճակի լուծումն է, բայց, ընդհանուր առմամբ, իրավիճակի, խնդրի լուծում չէ։ Բացատրեմ՝ ինչու, ինչով է տարբերվում Աննա Դանիբեկյանի դեպքը մյուս դեպքերից։ Ֆիզիկական միջամտություն, այդ երկու անձը այնքան են մոտեցել դատավորին, որ արդեն կարելի է խոսել դատավորի վրա ճնշման եւ դատարանի նկատմամբ անհարգալից վերաբերմունքի մասին կոնկրետ այս գործով։
– Բոլորը ԲԴԽ-ին հարց էին ուղղում՝ ինչու ԲԴԽ-ի կողմից արձագանք չեղավ ՀՀ վերաքննիչ դատարանի դատավոր Ալեքսանդր Ազարյանի, դատավոր Դավիթ Գրիգորյանի մասով։ Ինչո՞ւ նրանց հարցում ԲԴԽ-ն ոչ օբյեկտիվ գտնվեց։
Կարդացեք նաև
– Բացատրեմ. Եվրոպական դատարանը ունի բազմաթիվ նախադեպեր հետեւյալի մասին, որ որոշակի պաշտոնատար անձինք կան, որոնք պետք է հանդուրժող լինեն, որ իրենց մասին մամուլում ոչ իրենց ականջի համար հաճելի նյութ է տպագրվում։ Դա վերաբերում է բացառապես սոցիալական ցանցերում, մամուլում տեղ գտած նյութերին, դրա վերաբերյալ դատավորը պետք է հանդուրժող լինի եւ որոշում կայացնելիս էլ կանխատեսի, որ իր որոշումը դուր չի գա X քանակությամբ մարդկանց, մեկ այլ որոշումն էլ այլ խմբի մարդկանց կարող է դուր չգալ։ Սա իմ հստակ մոտեցումն է։ Այն, ինչ գրվում է, տպվում է, պետք է դրա նկատմամբ ավելի հանդուրժող լինել, իսկ ինչ վերաբերում է ֆիզիկական միջամտությանը, այնքան մոտենան դատավորին, որ նա վախենա, ճնշվի, ահաբեկվի։ Աննա Դանիբեկյանի դեպքը հենց դրանով է տարբերվում մյուս դեպքերից։ Օրինակ, եթե ես լինեի այդ իրավասու անձը, որ կարողանայի արձագանքել, ապա կարձագանքեի ՍԴ դատավոր Ալվինա Գյուլումյանի միջադեպին, որը եղել է ՍԴ շենքի մոտ՝ բազմաթիվ ոստիկանների առաջ, ինձ համար զարմանալի է՝ ինչու ոստիկանությունը եւ ՍԴ-ն չարձագանքեցին։
Զրուցեց Քնար ՄԱՆՈՒԿՅԱՆԸ
Հոդվածն ամբողջությամբ կարող եք կարդալ «Ժողովուրդ» թերթի այսօրվա համարում
