«Այդ հարցի հեղինակն իրականում գործող կառավարության առաջին դեմքն է, որը դատավորներին ասում է «վնգստացող շներ»: Դա է դատավորների հանդեպ անհարգալից վերաբերմունքը»,-«Հայելի» մամուլի ակումբում լրագրողների հետ հանդիպմանն այսօր անդրադառնալով Քոչարյանի եւ մյուսների գործով դատավոր Աննա Դանիբելյանի հետ կատարված միջադեպին, ասաց «Երկիր Ծիրանի» կուսակցության ղեկավար, իրավապաշտպան Զարուհի Փոստանջյանը: Հիշեցնենք, որ օրերս Ռոբերտ Քոչարյանի աջակիցներից Նարեկ Մութաֆյանը տեսանկարահանել էր դատավոր Աննա Դանիբեկյանին՝ նրան հարցնելով, թե արդյոք ինքը վնգստացող դատավորների թվի՞ն է պատկանում:
Մութաֆյանը, ինչպես նաեւ Սարգիս Օհանջանյանը, որը նկարել է կատարվածը, կալանավորված են: Դառնալով միջադեպին՝ Զարուհի Փոստանջյանը շեշտեց, որ հարց տալը քրեորեն հետապնդելի արարք չէ: «Հայտնի գաղտնալսումներում կար արտահայտություն ուղղված դատավորին, որ «ուզես-չուզես, կալանքը պիտի տաս»: Այսպես` կառավարությունը միջամտում է դատարանների գործունեությանը: Հետո շրջափակեցին դատարաններ, գործընթաց սկսեցին ՍԴ-ի դեմ: Սրանց գնահատական չի տրվում, բայց երբ երկու տղա փողոցում դատավորին հարց են տալիս, դա դառնում է քրեորեն հետապնդելի արարք»,-եզրափակեց Զարուհի Փոստանջյանը:
Լուիզա ՍՈՒՔԻԱՍՅԱՆ
