Պարզագույն ուտեստ է, բայց այնքա՜ն համեղ՝ տապակած սմբուկները լոլիկի թանձրուկի մեջ, դե, բնականաբար, քանի որ իտալական խոհանոցից է, պանիրն՝ անպակաս: Այս ուտեստը իտալացիները համարում են բուսակերների «լազանյա»:
Անհրաժեշտ մթերքները
Սմբուկ- 2-3 խոշոր, ցանկալի է հաստլիկ, կլորավուն տեսակի
Բուսական յուղ- 5-6 ճաշի գդալ
Կարդացեք նաև
Լոլիկ-10 հատ (կարելի է վերցնել նաեւ սեփական հյութում պահածոյացված լոլիկ)
Տոմատի մածուկ-2 ճաշի գդալ
Սխտոր-3 պճեղ
Չորացրած բուրավետ կանաչիներ (հազրեվարդ, օրեգանո, ռեհան՝ որը կամենաք, որը ունեք) – 1 թեյի գդալ
Աղ, սեւ պղպեղ՝ ըստ ճաշակի
Ձիթապտղի յուղ-1 ճաշի գդալ
Պարմեզան տեսակի պանիր- 50 գրամ
Մոցարելա պանիր-100 գրամ
Պատրաստաման եղանակը
Սմբուկները լավ լվանալ, կեղեւահան անել, չորացնել, շրջանաձեւ կտրատել եւ տապակել բուսայուղի մեջ:
Մինչ սմբուկները տապակվում են, պատրաստեք նաեւ թանձրուկը: Եթե լոլիկները թարմ են, լավ լվացեք, պոչի մասից խաչաձեւ կտրվածք արեք, շարեք թասիկի մեջ, վրան լցրեք եռման ջուր, թողեք 5 րոպե, որից հետո կեղեւահանեք, մանր կտրատեք, լցրեք փոքրիկ կաթսայի մեջ եւ դրեք ցածր կրակին՝ եփվելու: Եթե սեփական հյութի մեջ պահածոյացված լոլիկներ են, նույնպես կտրատեք, 4-5 ճաշի գդալ սեփական հյութի հետ լցրեք կաթսայի մեջ եւ դրեք մարմանդ կրակին: Ավելացրեք նաեւ կտրատած սխտորը: Պարբերաբար խառնեք: Մոտ 10 րոպեից ավելացրեք տոմատի մածուկը: Եթե շատ պինդ է ստացվում թանձրուկը, կարող եք կես բաժակ եռացրած ջուր ավելացնել: Թողեք եւս 7-8 րոպե եփվի, ապա ձեռքի կոտորակիչով (բլենդերով) մանրացրեք, դարձրեք համասեռ զանգված, ավելացրեք սեւ պղպեղը, աղը, չորացրած կանաչիները, ձիթապտղի յուղը, ավ խառնեք, դրեք մի կողմ:
Եթե սմբուկը տապակված է, թանձրուկը՝ եփված, մնում է «հավաքել» պարմիջիանան:
Հրակայուն ամանի մեջ լցրեք այնքան թանձրուկ, որ ծածկի ամանը: Վրան շարեք տապակած սմբուկներ: Սմբուկների վրա՝ քերած պարմեզան, ապա՝ շերտ-շերտ կտրատած մոցարելա: Նորից՝ թանձրուկը, վրան՝ տապակած սմբուկը, վրան՝ երկու տեսակի պանիրը: Այդպես շարեք այնքան, մինչեւ եւ թանձրուկը վերջանա, եւ սմբուկները:
Դրեք 180-190 աստիճան տաքացրած ջեռոցը 15-20 րոպեով: Անջատեք, թողեք եւս հինգ րոպե, որից հետո մատուցեք: Կարող եք զարդարել թարմ բազիլիկով (կանաչ ռեհան):
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
