«Սասնա ծռեր» համահայկական շարժման ղեկավար-անդամ, Շուշիի առանձնակի գումարտակի հրամանատար Ժիրայր Սեֆիլյանը կարծում է, որ հայաստանյան կնճռոտ հարցերի առկայության պատճառը նոր իշխանության կողմից նախորդ ռեժիմի հասցեին քաղաքական գնահատական չհնչեցնելն է: «Երբ Նիկոլ Փաշինյանը նստեց պետության ղեկին, Կրեմլը սկսեց գործընթաց, որի նպատակն է՝ օր առաջ ձախողեցնել նրա կառավարությանը»,-«Հայացք» մամուլի ակումբում լրագրողների հետ հանդիպմանն այսօր հայտարարեց Ժիրայր Սեֆիլյանը:
Նրա բնորոշմամբ՝ Կրեմլի նշյալ գործելաոճը հիմա էլ է շարունակվում. «Նենգադուլների պատճառով մեր երկիրը վնասներ է կրում, այդ թվում՝ սոցիալ-տնտեսական: Խոսքն այդ թվում գազի գնի բարձրացման մասին է: Իմ տեղեկություններով՝ առաջիկայում եւս գազի գինը բարձրանալու է: Եթե այս մեկ եւ կես տարում ճիշտ վարվեինք, գազի գինն ավելի էժան պետք է լիներ: Հոսանքի գինն էլ է ուռճացված: Տեսանք, թե ինչպես Լարսի անցակետը «փակվեց»: Այս ամենի նպատակը մեր իշխանությանը ճնշելն է: Մինչ օրս իշխանությունը մի «Սանիթեքի» հախից անգամ չի կարողանում գալ: Իշխանության վարկանիշի անկմաննն օր առաջ սպասում են Կրեմլում: Այդ վարկանիշի իջեցումից հետո նրանք նպատակ ունեն Փաշինյանի իշխանությանը հեռացնելու»:
https://www.facebook.com/aravot.am/videos/382512712640452/
Կարդացեք նաև
Ըստ Ժիրայր Սեֆիլյանի. «Փաշինյանի դիմադրության փորձերի ականատեսն ենք այս ընթացքում: Դրսեւորումներից մեկը ԱԱԾ պետի եւ ոստիկանապետի հեռացումն էր եւ այն օրինագիծը, որով այս կառույցների ղեկավարների պաշտոնին կկարողանան հայտնվել մարդիկ, որոնք կապ չունեն այդ համակարգերի հետ: Խնդիրը Վանեցյանի անձի մեջ չէ: ԱԱԾ-ն պետք է մասնատել ըստ գործառույթների»:
Լուիզա ՍՈՒՔԻԱՍՅԱՆ
