Ռուսական Russia Today անգլալեզու հեռուստաալիքի կայքէջը «Անհարմար է. Նեթանյահուն կշտամբում է Էրդողանին Հայոց Ցեղասպանությունը չճանաչելու համար, որը Իսրայելը ևս չի ճանաչել» վերտառությամբ հոդված է հրապարակել, որում անդրադարձել է Իսրայելի վարչապետ Բենիամին Նեթանյահուի տեսաուղերձին:
Հիշեցնենք, որ Իսրայելի վարչապետն ասել էր. «Նա, ով չի դադարում ստել Իսրայելի մասին, սպանում է քրդերին իր երկրում, հերքում է հայ ժողովրդի սարսափելի կոտորածը, չպետք է Իսրայելին խրատի։ Էրդողա՛ն, դադարի՛ր ստել»:
«Բենիամին Նեթանյահուի կողմից Ռեջեփ Էրդողանին քննադատելը Հայոց ցեղասպանությունը չճանաչելու համար ավելի անկեղծ կլիներ, եթե նա անձամբ չարգելափակեր հայերի ցեղասպանությունը ճանաչելու փորձը նախորդ տարի»,-գրում է հոդվածագիրը՝ հիշեցնելով, որ նախորդ տարի Նեթանյահուն անձամբ միջամտել է և արգելափակել Հայոց ցեղասպանությունը ճանաչելու գործընթացը Կնեսետում՝ պատճառաբանելով, որ նման որոշումը կարող է դրդել թուրք ազգայնականիներին նախագահական ընտրություններում աջակցել Էրդողանին:
Հոդվածում նաև նշվում է, որ Նեթանայահուի և Էրդողանի հարաբերությունները վատացել են, ինչն իր ազդեցությունն է թողել նաև երկու երկրների առևտրային հարաբերությունների վրա: Ինչ վերաբերում է ռազմական ոլորտում համագործակցությանը, ապա վերջին տասնամյակին Թուրքիային փոխարինել է Ադրբեջանը, որը մեծ քանակությամբ զենք է գնում Իսրայելից՝ ասվում է հոդվածում:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
