Ինչի՞ մասին կարող է խոսել Վանեցյանը, Aravot.am-ի այս հարցին այսօր Անվտանգության խորհրդի քարտուղար Արմեն Գրիգորյանը պատասխանեց. «Ես չգիտեմ՝ ինքն ինչի՞ մասին է ուզում խոսել, շատ կդժվարանամ ասել: Դժվար է կռահել՝ մարդն ինչի մասին կարող է խոսել»:
Հիշեցնենք, որ ԱԱԾ նախկին ղեկավար Արթուր Վանեցյանն արձագանքելով վարչապետի՝ Լոս Անջելեսում իր հրաժարականի վերաբերյալ արված հայտարարությանը, ասել էր՝ «Պատկերացնո՞ւմ եք, եթե հանկարծ ես սկսեմ խոսել առանց հետեւանքների մասին մտածելու»։
Հարցին՝ արդյոք Վանեցյանի ասածները չեն կարող վտանգել ազգային անվտանգությունը պարոն Գրիգորյանն ի պատասխան ասաց. «Եթե ես ռացիոնալ եմ մտածում, մտածում եմ, որ վտանգ չպետք է լինի, բայց, երբեմն վարքագիծը իռացիոնալ է, եւ, եթե այդ վարքագիծն իռացիոնալ լինի, բնականաբար վտանգ է ներկայացնում: Բայց ես հուսով եմ՝ ինչի մասին էլ խոսի կմնա ռացիոնալության շրջանակներում եւ, ընդհանուր, անվտանգության տեսանկյունից, մենք որեւիցե խնդիր չենք ունենա»:
Լուսինե ԲՈՒԴԱՂՅԱՆ
