2016թ.-ին ՀՀ ոստիկանության ՊՊԾ գունդը զավթած եւ մի շարք ծանր հանցագործությունների կատարման համար մեղադրվող «Սասնա ծռեր» խմբի անդամների գործով այսօրվա դատական նիստում հայտարարությամբ հանդես եկավ մեղադրյալ, խմբի անդամ Պավլիկ Մանուկյանը՝ դատարանի ուշադրությունը հրավիրելով այն փաստի վրա, որ մեղադրյալներից Արմեն Բիլյանը մինչ օրս կալանքի տակ է: Հիշեցնենք, որ Արմեն Բիլյանը մեղադրվում է ոստիկաններից Գագիկ Մկրտչյանի սպանության համար: Նրան կալանքից ազատելու միջնորդությունը քանիցս մերժվել է, զոհված ոստիկանի այրին էլ դեմ է արտահայտվել Բիլյանի ազատմանը:
«Դա պատահական կրակոց է եղել, որի հեղինակը Բիլյանը չէ, նա անգամ այդտեղ չի եղել այդ պահին, դա որեւէ մեկը չի ժխտում»,-նշեց Պավլիկ Մանուկյանը: Ապա ասաց. «Ես ասում եմ ճշմարտությունը, երբեւէ չեմ վախեցել ապստամբելուց, մեռնելուց եւ ճիշտն ասելուց։ Հիմա էլ եմ ասում՝ եթե պետք լինի, եթե այս իշխանությունները շարունակեն նախորդի սրիկա գործելաոճը, ես էլի կմնամ նույն ապստամբը»:
Մեղադրյալ Արմեն Բիլյանն էլ իր հերթին հայտարարեց՝ եթե պետք լինի, եթե ժողովրդին նեղացնեն, ինքն էլի կապստամբի:
Մեղադրյալների ասածներին արձագանքեց մեղադրող-դատախազ Պետրոս Պետրոսյանը. «Դրանք քննվող առարկայի հետ կապ չունեցող հայտարարություններ են: Դրանք որեւէ կապ չունեն քրեական գործի եւ արդեն իսկ կայացած դատավարական գործողությունների հետ»: Պետրոսյանը գտնում է, որ Բիլյանի փախանման միջոց կալանքը հիմնավոր է:
Կարդացեք նաև
Լուիզա ՍՈՒՔԻԱՍՅԱՆ
