ԱՄՆ Կոնգրեսի խոսնակ Նենսի Փելոսին հայտարարել է այն մասին, որ Ներկայացուցիչների պալատը պատրաստ է սկսել ԱՄՆ նախագահ Դոնալդ Թրամփին իմպիչմենտ հայտարարելու գործընթացը: Ինչպես հաղորդում է BBC-ն, պատճառը Սպիտակ տան ղեկավարի և Ուկրաինայի նախագահի միջև հուլիսի 25-ին տեղի ունեցած հեռախոսազրույցն է:
Հեռախոսազրույցի ընթացքում Թրամփն Ուկրաինայի իշխանություններից իբրև թե պահանջել է հետաքննություն սկսել ԱՄՆ նախկին փոխնախագահ Ջո Բայդեն հանդեպ, որը գործող նախագահի հավանական հակառակորդն է լինելու 2020թ. նախագահական ընտրություններում: Հայտնի է դարձել, որ Բայդենը երկու ամսով ուշացրել է Ուկրաինային տրամադրվող ռազմական օգնության հատկացումը:
ԱՄՆ նախագահին իմպիչմենտ հայտարարում է Ներկայացուցիչների պալատը, որտեղ այսօր մեծամասնություն են կազմում դեմոկրատները: Բայց վերջին խոսքը Սենատինն է, որը վերահսկում են հանրապետականները:
Ի՞նչ է իմպիչմենտը
Կարդացեք նաև
ԱՄՆ-ի Սահմանադրությունը Կոնգրեսին իրավունք է տալիս գործող նախագահին հեռացնել իշխանությունից, եթե օրենսդիրները որոշեն, որ պետության ղեկավարը «դավաճանություն է իրականացրել, կաշառք է վերցրել կամ այլ ծանր հանցագործություններ ու իրավախախտումներ է արել»: ԱՄՆ պատմության մեջ իմպիչմենտի ընթացակարգի մասին հայտարարվել է 3 անգամ: 1868թ. Կոնգրեսը փորձել է իշխանությունից հեռացնել նախագահ Էնդրյու Ջոնսոնին, իսկ 1998թ. իմպիչմենտ է հայտարարվել Բիլ Քլինթոնին: Այնուամենայնիվ, Սենատն ավելի ուշ արգելափակել է նախաձեռնությունները, նախագահները շարունակել են պաշտոնավարել: 1974թ. նախագահ Ռիչարդ Նիքսոնը իմպիչմենտի սպառնալիքի պատճառով ինքնակամ լքել է պաշտոնը՝ չսպասելով Կոնգրեսի որոշմանը: Օրինակ՝ Բիլ Քլինթոնի դեպքում իմպիչմենտի ընթացակարգ սկսելու պատճառ է հանդիսացել ոչ թե Մոնիկա Լևինսկու հետ սիրավեպ ունենալու փաստը, այլ այն, որ նախագահը կեղծ վկայություն է տվել հարաբերությունների մասին :
Քանի օրենսդիր է աջակցում իմպիչմենտի նախաձեռնությանը
ԱՄՆ նախագահ Դոնալդ Թրամփին իմպիչմենտ հայտարարելու նախաձեռնության կողմնակիցների թիվն աճում է, բայց առայժմ բարդ է ասել, որ նրանք մեծամասնություն են: Կոնգրեսի ստորին պալատը 435 անդամ ունի: Օրինակ՝ New York Times թերթի տվյալներով՝ գործող նախագահին իմպիչմենտ հայտարարելու գործընթացին աջակցում է 179 օրենսդիր, դեմ է արտահայտվել 73-ը, Կոնգրեսի ևս 183 անդամ առայժմ չի հայտարարել իր դիրքորոշման մասին:
Միևնույն ժամանակ ԱՄՆ-ի Սահմանադրությունը Սենատին չի պարտավորեցում «դատական լսումներ» անցկացնել՝ վերին պալատի կուսակցական մեծամասնության առաջնորդին թույլատրելով ուղղակի հրաժարվել նման լսումներից: Նա նաև կարող է քվեարկություն անցկացնել, որի ընթացքում իմպիչմենտի մասին Կոնգրեսի բանաձևը կարող է չընդունվել:
Պատրաստեց՝ Վիկտորյա ԱՆԴՐԵԱՍՅԱՆԸ
