Պաշտոնական Անկարան արձագանքել է Իսրայելի վարչապետ Բենիամին Նեթանյահուի տեսաուղերձին, որում նա կոշտ քննադատության էր ենթարկել Թուրքիայի նախագահ Ռեջեփ Թայիփ Էրդողանին:
Թուրքիայի նախագահի խոսնակ Իբրահիմ Քալընը Twitter-ի իր էջում գրառում է կատարել, որում մասնավորապես ասվում է. «Իսրայելի վարչապետը վրդովված է, քանի որ նախագահ Էրդողանը բարձրաձայնում է ճշմարտությունն այն մասին, որ Իսրայելն օկուպացրել է պաղեստինյան հողերը, իսկ պաղեստինցիները ենթարկվում են ճնշումների»: Նրա խոսքով՝ Թուրքիայի նախագահը շարունակելու է աջակցել ճնշվածներին:
Թուրքիայի նախագահի աշխատակազմի հանրային կապերի բաժնի ղեկավար Ֆահրեթթին Ալթունը Twitter ևս անդրադարձել է Նեթանյահուի հայտարարությանը: Նա, մասնավորապես, գրել է. «Բենյամին Նեթանյահուն մինչև կոկորդը խրված է անօրինականության հետ կապված մեղադրանքների մեջ և փորձում է հերթական անգամ ներքին խնդիրներից շեղել հանրության ուշադրությունը»:
Հիշեցնենք, որ Իսրայելի վարչապետն ավելի վաղ ասել էր. ««Նա, ով չի դադարում ստել Իսրայելի մասին, սպանում է քրդերին իր երկրում, հերքում է հայ ժողովրդի սարսափելի կոտորածը, չպետք է Իսրայելին խրատի։ Էրդողա՛ն, դադարի՛ր ստել»:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
