«Ես ամենայն պատասխանատվությամբ հայտարարում եմ՝ այս հայեցակարգը Հայաստանում չի մշակվել, սա հայկական ծագում չունի»,- այսօր «Դատաիրավական բարեփոխումների հիմնական ուղղությունները» խորագրով խորհրդաժողովի ժամանակ հայտարարեց «Մեկ Հայաստան» կուսակցության նախագահ, իրավաբանական գիտությունների թեկնածու, դոցենտ Արթուր Ղազինյանը՝ նկատի ունենալով արդարադատության նախարարության մշակած Դատական եւ իրավական բարեփոխումների 2019-2023թթ ռազմավարությունը:
Նա ասաց, որ 2018-ի դեկտեմբերի 8-ին էլ «Հայաստանի վերականգման հայեցակարգ» էին մշակել, կարծես Հայաստանը քանդված էր: Այս հայեցակարգի հեղինակներն էին «Ասպարեզ» ակումբը, Հելսինկյան ասոցիացիան, «Թրանսփարենսի ինթերնեյշընըլը» եւ այլն: Եվ նախարարության մշակած ռազմավարությունը մեկին մեկ կրկնում է նույն այդ հայեցակարգը:
Ղազինյանն ասաց, որ այդ ռազմավարությունը մշակվել է «Թրանսփարենսի ինթերնեյշընըլ» կազմակերպության կողմից՝ կոնկրետ դոնորի ֆինանսավորմամբ, կոնկրետ նպատակով. «Սա ՀՀ շահի հետ որեւէ առնչություն չունի»:
Արթուր Ղազինյանը նշեց, որ պետք է իրենք էլ իրենց այլընտրանքն առաջարկեն այդ հայեցակարգին. «Ասել, որ սա լավը չի, բավարար չի, մի մեծ բանակ կաղմկեն ու մեզ ասեն՝ դուք չեք ուզում, որ Հայաստանը վերականգնվի, դուք Հայաստանի դեմ եք: Մտածենք ինչ առաջարկենք»:
Կարդացեք նաև
Հռիփսիմե ՋԵԲԵՋՅԱՆ
