Հայաստանի հանրապետության վարչապետ Նիկոլ Փաշինյանը հարցազրույց է տվել FOX 11 Los Angeles հեռուստաընկերությանը՝ անդրադառնալով թավշյա հեղափոխությանը, կոռուպցիայի դեմ պայքարին, Հայաստանի և սփյուռքի ապագային, Արցախի հիմնախնդրին:
Խոսելով արցախյան հակամարտության կարգավորման մասին՝ Փաշինյանը շեշտել է, որ հակամարտության յուրաքանչյուր լուծում պետք է ընդունելի լինի Հայաստանի, Արցախի և Ադրբեջանի ժողովուրդների համար: «Հայաստանի միակ ղեկավարն եմ, որ ասում եմ՝ հակամարտության լուծումը պետք է ընդունելի լինի նաև Ադրբեջանի ժողովրդի համար, ինչի համար քննադատության եմ ենթարկվել Հայաստանում: Բայց շատ կարևոր է աշխատել հակամարտության խաղաղ հանգուցալուծման ուղղությամբ, այժմ սպասում եմ, որ Ադրբեջանի նախագահ Իլհամ Ալիևը կասի և կընդունի նույն բանաձևը… Եթե ադրբեջանցի իմ գործընկերն ընդունի այս բանաձևը, կմոտենանք հակամարտության խաղաղ կարգավորմանը»:
Վարչապետն ընդգծել է, որ բավականին ջերմ ընդունելության է արժանացել ԱՄՆ-ի հայ համայնքի կողմից: Լրագրող Արաքսյա Կարապետյանը հետաքրքրվել է Փաշինյանից՝ ինչու հեղափոխության մեկնարկը տրվեց Գյումրիում, ի պատասխան վարչապետն ասել է. «Գյումրին Հայաստանի մեծությամբ երկրորդ քաղաքն է… շատ կարևոր քաղաք է մեզ համար, մշակույթի, արվեստի, արհեստի կենտրոն»:
Անդրադառնալով կոռուպցիայի դեմ պայքարին՝ Փաշինյանն ասել է, որ նման դիմադրությունը իշխանական նախկին վերնախավի կողմից սպասելի էր, ինչ վերաբերվում է հեղափոխությունից հետո մարտահրավերներին, վարչապետը շեշտել է, որ անսպասելի կամ անկանխատեսելի մարտահրավերներ չեն եղել: «Մենք գիտեինք մենք երկիրը, գիտեինք՝ ինչ է կատարվում մեր երկրում, աշխարհում, ուստի անակնկալներ չեն եղել»:
Կարդացեք նաև
Վարչապետը նաև համոզմունք է հայտնել, որ տնտեսական հեղափոխությունը հաջողելու է և շեշտել, որ քաղաքական հեղափոխությունից հետո հայ ժողովուրդը քաջ գիտակցում է՝ որքան կարևոր է յուրաքանչյուրի անհատական ջանքը փոփոխություններ իրականացնելու գործում: «Յուրաքանչյուր քաղաքացի գիտակցեց իր ուժը, երբ հասարակությունը միավորվում է ոչ մի ուժ չի կարող հաղթել նրան»:
Լրագրողի դիտարկմանը, որ փոփոխությունները ժամանակ են պահանջում և հնարավոր է՝ մարդիկ մի օր կորցնեն համբերությունը, Փաշինյանն ասել է, որ նման մտավախություն չունի: «Մարդիկ տեսնում են՝ ինչ ենք մենք անում, ինչու և ինչպես: Հստակ, շոշափելի արդյունքներ ունենք, ուստիկ մարդիկ տեսնում են, որ ահռելի փոփոխություններ իրականացնելու ճանապարհին ենք»:
Պատրաստեց՝ Վիկտորյա ԱՆԴՐԵԱՍՅԱՆԸ
