Սեպտեմբերի 23-ին Արցախի ՊԲ-ն հայտնեց, որ արցախաադրբեջանական հակամարտ զորքերի շփման գծում հակառակորդը ձեռնարկել է դիվերսիոն ներթափանցման փորձ: Ադրբեջանի պաշտպանության նախարարությունն արձագանքեց, որ իր զինծառայողը մոլորվել է, հայտնվել միջդիրքային տարածությունում եւ սպանվել:
«Օրբելի» վերլուծական կենտրոնի Ադրբեջանի հարցերով փորձագետ Տարով Հովհաննիսյանը, սակայն, շեշտում է՝ դեռեւս դեպքի նախորդ երեկոյան սոցցանցի ադրբեջանական տիրույթում տեղեկություն տարածվեց այն մասին, որ այդ զինծառայողն, այնուամենայնիվ, ինչ-ինչ գործողություններ է կատարել միջդիրքային տարածությունում:
«Ադրբեջանի ռազմական բլոգերներից մեկը գրեց մի բան, որն Ադրբեջանի ՊՆ-ի հայտարարության մեջ չկար: Նա ասել է, որ զինծառայողը եկել էր հայկական դիրքերի ուղղությամբ, նռնակ նետել, փորձել հեռանալ, եւ սպանվել է: Փորձում էին հերոսացնել զինծառայողի արարքը: Տեղեկություն կա նաեւ այն մասին, որ զինծառայողը եղել է մարզված, ամենայն հավանականությամբ՝ Ադրբեջանի ըմբշամարտի ֆեդերացիայի անդամ»,-«Հենարան» մամուլի ակումբում լրագրողների հետ զրույցում այսօր ասաց Տարոն Հովհաննիսյանը:
Նրա խոսքով՝ հիմնավոր է Արցախի Պաշտպանության բանակի տեղեկությունը, որ եղել է դիվերսիոն թափանցման փորձ. «Հավանական է, որ այդ զինծառայողը միայնակ փորձել է դիվերսիոն գործողություն իրականացնել եւ սպանվել է: Սրա նախադրյալները գալիս են դեռեւս 2010թ.-ից, երբ Ադրբեջանի զինծառայողներից մեկը փորձել էր միայնակ դիվերսիոն գործողություն իրականացնել, եւ սպանվել էր: Այդ ժամանակ զոհվեցին հայկական կողմի զինծառայողներ: Իբրահիմովն Ադրբեջանում հերոսացվեց: Այս դեպքում էլ ադրբեջանցի զինծառայողի արածը մահապարտ-ահաբեկչի գործողությունների բնույթին է համապատասխանում: Գուցե ոգեւորվելով նախադեպից՝ նա փորձել է կրկնել դա եւ հերոսանալ: Ամեն դեպքում, պատասխանատվությունը Ադրբեջանի վրա է, որը հերոսացնում է մահապարտ ահաբեկչին եւ Ռամիլ Սաֆարովին»:
Կարդացեք նաև
https://www.facebook.com/aravot.am/videos/775488949575078/
Լուիզա ՍՈՒՔԻԱՍՅԱՆ
