Aravot.am-ը դժգոհություններ է ստացել թիվ 51 դպրոցի մաթեմատիկայի ուսուցչուհի Գայանե Աբաջյանի վերաբերյալ, որը, ծնողների վկայությամբ, անընդհատ վիրավորական խոսքեր է ասում աշակերտների հասցեին: Ծնողներից մեկի հավաստիացմամբ, նա օրերս կրկին վիրավորել է երեխաներին:
Aravot.am-ը կապվեց դպրոցի տնօրեն Լուսինե Ղասաբօղլյանի հետ: Տնօրենը տեղեկացրեց, որ իսկապես իրեն է մոտեցել 8-րդ դասարանցիներից մեկի ծնողը: Նաեւ հավելեց, որ ավելի վաղ խոսակցություն էր ունեցել մաթեմատիկայի ուսուցչուհու հետ, եւ նա խոստացել էր երեխաներին չկոպտել: «Տիկին Աբաջյանին հորդորել էի, որ մոտեցումը փոխի, հարգի աշակերտներին, սիրով անի իր աշխատանքը: Մաթեմատիկան բարդ առարկա է , հետեւաբար ուսուցչի նկատմամբ սերն անմիջապես անդրադառնում է առարկայի վրա: Ասել էի, որ եթե ինքներդ չեք կարողանում ձեզ կառավարել, ինչպե՞ս կկառավարեք ամբողջ դասարանը: Մենք եկանք համաձայնության, ինքն ինձ վստահեցրեց, որ լավ կաշխատի ու մինչեւ վերջերս ոչ մի խնդիր չէր եղել»,-հայտնեց տնօրենը:
Տիկին Ղասաբօղլյանը նշեց, որ այժմ պատրաստվում է խորհրդակցություն հրավիրել, որին կմասնակցի ոչ միայն ուսուցիչը, այլեւ ծնողը, կփորձի խնդիրը շտկել:
Նշենք, որ անցյալ տարի աշակերտները նույնիսկ նկարել էին մաթեմատիկայի ուսուցչուհուն այն պահին, երբ նա գրքով հարվածում է երեխաներից մեկի գլխին, եւ այդ տեսանյութը մեր տրամադրության տակ է:
https://www.youtube.com/watch?v=LeGFrHrU1UQ
Գոհար ՀԱԿՈԲՅԱՆ
Լուսանկարը` դպրոցի կայքից:
