Նիկոլ Փաշինյանի հրապարակած 100 փաստերում տեղ չեն գտնում նոր իշխանությունների արձանագրած բացասական ցուցանիշները, որոնցից մեկն, ըստ տնտեսագետ Թադեւոս Ավետիսյանի, ժողովրդագրության անկում ապրած ցուցանիշներն են: Պարոն Ավետիսյանը, որը նաեւ ՀՅԴ Բյուրոյի տնտեսական հետազոտությունների գրասենյակի ծրագրերի համակարգողն է, այսօր «Հենարան» ակումբում ասաց, որ անցյալ տարվա վեց ամիսների համեմատությամբ, այս տարվա վեց ամիսների տվյալներով, 8200-ով մշտական բնակչության թիվը կրճատվել է, ծնունդները, նույնպես, ճիշտ է քիչ, բայց 150-ով նվազել են, մահացության ցուցանիշն էլ բարձրացել է: Տնտեսագետը գտնում է, որ այս տեմպերով դժվար թե հասնենք 2050 թվականին 5 միլիոն բնակչություն ունենալու Փաշինյանի թեզին:
Մանրամասները՝ տեսանյութում
Թադեւոս Ավետիսյանը որպես բացասական փաստ մատնանշեց նաեւ պետական բյուջեի կապիտալ ծախսերը շուրջ 65 միլիարդ դրամով թերակատարումը:
«Այն հիմնավորումները, թե չկան բավականաչափ մեխանիզմներ, այդ կոռուպցիան կանխարգելելու համար, սա բացատրություն չէ, որովհետեւ այդ գումարները պետք է ծառայեն համախառն ներքին արդյունքի աճին, տնտեսության մեջ լրացուցիչ պահանջարկ խթանելուն, ինչը կարեւոր է: Բայց երբ որ պետությունը հարկերը հավաքում է տնտեսությունից եւ ծախսերը չի կատարում, թերակատարում է, այստեղ արդեն բացասական ազդակներ են տնտեսության զարգացման առումով, մանավանդ՝ դրանք իրենց ազդեցությունը կթողնեն միջնաժամկետ, երկարաժամկետ հատվածում»:
Կարդացեք նաև
Տնտեսագետը բացթողում համարեց բազմազավակ ընտանիքներին պետական աջակցման ծրագրերի բացակայությունը: Ըստ նրա, նոր Սահմանադրության պահանջներից է նաեւ այդպիսի ընտանիքների համար պետական աջակցության ծրագրերը՝ օրենքով. «Մինչդեռ այսօր ո՜չ այդ օրենքն ունենք, ո՜չ էլ այդ ծրագրերը: Ցավոք միջնաժամկետ ծախսային ծրագրերում՝ 2020-21 թվականների, հիմա նաեւ 22-ն է մշակվում չունենք նաեւ ապագա ծրագրերում այդ մասին առանձին հատկացումներ, ինչը եւս մտահոգիչ է»:
Տնտեսագետ Ավետիսյանի խոսքով, օտարերկրյա ուղղակի ներդրումները 30 միլիարդ դրամով պակասել են: Aravot.am-ի հարցին՝ ուսումնասիրություն կա՞ հատկապես որ երկրներից են ներդրումները նվազել, մասնագետները վկայում են, որ հատկապես՝ Ռուսաստանից մեր երկրում կատարվող ներդրումներն են սառեցվել, պարոն Ավետիսյանն ասաց՝ ճիշտն ասած՝ չեմ ուսումնասիրել:
Մանրամասները՝ տեսանյութում
Լուսինե ԲՈՒԴԱՂՅԱՆ
