Սեպտեմբերի 18-ին Թուրքիայում կայացած Սեւծովյան տնտեսական համագործակցության կազմակերպության խորհրդարանական վեհաժողովի տնտեսական, առեւտրի, տեխնոլոգիական եւ բնապահպանական հարցերի հանձնաժողովի հերթական նիստում ՀՀ ԱԺ նախագահ Վահե Էնֆիաջյանը պատասխանել է ավելի վաղ Բաքվում Սեւծովյան տնտեսական համագործակցության խորհրդարանական վեհաժողովի գլխավոր վեհաժողովի լիագումար նիստում Ադրբեջանի պատվիրակության ներկայացուցիչ Էլգար Գուլիեւի այն հայտարարությանը, թե ՀՀ-ն իբրեւ չէ օկուպացրել է ադրբեջանական հողերը:
https://www.facebook.com/VaheEnfiajyan/videos/356748755203204/?v=356748755203204
Լրագրողների հետ հանդիպմանն այսօր Վահե Էնֆիաջյանն ընդգծեց, որ Ադրբեջանն Արցախյան հակամարտության իրեն ձեռնտու թեզերը շահարկելու հերթական փորձն է արել մի հարթակում, որը դրա համար նախատեսված չէ:
«Ես ներկայացրի ՀՀ դիրքորոշումն այդ հարցում, պարզաբանեցի, որ տարածքային խնդիրները խորհրդարանական վեհաժողովի առաքելության մեջ չեն մտնում, դրա գործառույթները բացառապես տնտեսական են, մինչդեռ Ադրբեջանը զավեշտալի փորձ արեց: Խորհրդարանական վեհաժողովի կենտրոնական գրասենյակը Թուրքիայում է: Կառույցի 12 երկրների մեծ մասը տարածքային ամբողջականության խնդիրներ ունեն: Երբ լարվածություն է լինում, այդ երկրի պատվիրակության ներկայացուցիչները, իմանալով, որ կառույցի առաքելությունն այլ է, նախընտրում են լռել՝ տեղ թողնելով, որպեսզի Ադրբեջանի կամ Թուրքիայի ներկայացուցիչները տարածքային խնդիրներին անդրադառնան եւ փաստաթղթերում ամրագրեն ՀՀ-ի համար ոչ ցանկալի հարցեր»,-փաստեց Վահե Էնֆիաջյանը:
Կարդացեք նաև
Նա նշեց, որ իր պարզաբանումն անհետեւանք չի մնացել. «Մեր խոսակցությունը որոշակի վեճի վերածվեց իմ ելույթից հետո, երբ ասացի, որ Բաքվում Ադրբեջանի ելույթն անթույլատրելի է: Բոլորին համարժեք պատասխան եմ տվել քննարկումներից հետո: Հասկանալի է, որ իրենց մոտ պատվի հարց կար: Ուզում էին ամեն ինչ անել, որ հայկական պատվիրակությունն իր գործառույթները լիարժեք չիրականացնի: Մեր պատասխանները, սակայն, լինելու են համարժեք»:
Լուիզա ՍՈՒՔԻԱՍՅԱՆ
