Սեպտեմբերի 17-ին ՌԴ պետական դումայում կայացել է ՀՀ ԱԺ տարածաշրջանային եւ եվրասիական ինտեգրման հարցերի մշտական հանձնաժողովի եւ ԱՊՀ երկրների եվրասիական ինտեգրման եւ հայրենակիցների հարցերով կոմիտեի համատեղ նիստը, որի ընթացքում քննարկվել են հայ-ռուսական հարաբերություններին առնչվող մի շարք խնդիրներ: Հանձնաժողովի նախագահ, ԲՀԿ պատգամավոր Միքայել Մելքումյանն այսօր լրագրողների հետ հանդիպմանը հայտարարեց՝ կարեւոր խնդիր է Մեծամորի ատոմակայանի ռեսուրսի օգտագործման երկարեցման հարցը, որի համար երեք տարի առաջ ՀՀ-ն վարկ եւ դրամաշնորհ է ստացել գործընկեր ՌԴ-ից:
«Մենք ունեինք տեղեկություն, որ 200 միլիոն դոլարն արդեն տրամադրվել է, իսկ 70 միլիոնի պարագայում վարկը դեռ չի տրվում «ՌոսԱտոմ»-ի կողմից: Խնդիր կունենանք, որովհետեւ հունվարից այդ վարկի ծախսը ներառվելու է էլեկտրաէներգիայի սակագնի մեջ, այսինքն՝ էլեկտրաէներգիայի սակագնի փոփոխություն կլինի: Մենք բարձրաձայնել ենք ատոմակայանի վարկի ճակատագրի հարցը, կոմիտեն առարկություններ չուներ»,-հայտնեց Միքայել Մելքումյանը:
Նրա խոսքով՝ մյուս կարեւոր հարցը ՌԴ-ում ՀՀ քաղաքացիների վարորդական իրավունքների վավերականության խնդիրն է. «Մինչեւ տարվա վերջ վարորդական իրավունքների հարցը պետք է լուծվի, որովհետեւ ԵՏՄ-ում հավասար պայմաններ պետք է լինեն: ԵՏՄ կոլեգիայում տեղյակ են պետդումայում կայացած մեր քննարկումից»:
Մյուս խնդիրը, Միքայել Մելքումյանի բնորոշմամբ, ՀԱՊԿ շրջանակում մեկ երկրի կողմից ՀԱՊԿ անդամ չհանդիսացող երկրին հարձակողական նշանակության զենքի մատակարարումն է: Խոսքը Ռուսաստան-Ադրբեջան զենքի մատակարարման մասին է: «Հարցը բարձրաձայնել ենք, որեւէ բացասական արձագանք չեղավ այն մասին, որ որոշակի ձեւաչափ մշակվի՝ Ադրբեջանին զենքի վաճառքի առնչությամբ: Ռուսաստանն իր ծրագիրն է իրականացնում զենքի վաճառքի, բայց անընդունելի է կործանիչ զենքի վաճառքը»,-համոզմունք հայտնեց Միքայել Մելքումյանը:
Կարդացեք նաև
https://www.facebook.com/aravot.am/videos/461647564423888/
Լուիզա ՍՈՒՔԻԱՍՅԱՆ
