Լոս Անջելեսում ավանդական հայ կուսակցությունների ղեկավար կազմերի հետ հանդիպումներից հետո ՀՀ վարչապետ Նիկոլ Փաշինյանը հանդիպեց Լոս Անջելեսում Կալիֆորնիայի հայ համայնքի կառույցների ղեկավարության հետ: ՀՀ վարչապետն ասաց, որ դեռ այսօր առիթ ունենալու է ելույթ ունենալ Գրանդ փարկում՝ ԱՄՆ ժամանակով ժամը 16.00-ին և երկար խոսել: Եվ առաջարկեց, որ այս հանդիպմանն ավելի շատ լինի լսողի, հարցերին պատասխանողի դերում և նախընտրեց անցնել գործնական հարցերի քննարկմանը:
ՀՀ-ի սահմանամերձ մարզերում իրականացվող ծրագրերով զբաղվող Մարգարիտա Բաղդասարյանը նկատեց՝ ՀՀ-ում սահմանամերձ և հեռավոր գյուղերում դպրոցների վիճակը շատ վատ վիճակում է, մանկապարտեզներ ընդհանրապես չկան և հարցրեց՝ ի՞նչ պլաններ ունի կառավարությունը դպրոցների և մանկապարտեզների զարգացման հետ կապված: Նիկոլ Փաշինյանը պատասխանեց. «Մենք շատ մեծ պլաններ ունենք դրա հետ կապված: Ընդհանրապես «Իմ քայլը» դաշինքի նախընտրական ծրագրում մանկապարտեզի հետ կապված, ըստ էության, այնպիսի խոստում կա, որ կարելի է համարել մեգանախագիծ: Հիմա փորձնական մի ծրագիր ենք իրականացնում ՀՀ գյուղերից մեկում, որտեղ պիտի առաջիկա օրերին սկսվի մոդուլային փորձնական մանկապարտեզի կառուցումը: Եթե այդ փորձն արդյունավետ լինի, մենք այդ ծրագիրը շատ մեծ ծավալներով կիրականացնենք: Այն, ինչ ասում եք, մեր առաջնահերթություններից է: Այնպես չէ, որ միայն սահմանամերձ դպրոցների գյուղերի, դպրոցների կամ մանկապարտեզների պակասը կա: Դա ՀՀ-ի համար համատարած երևույթ է: Այն քաղաքական, տնտեսական խնդիրները, որ մեր առաջ դրել ենք, անհնար է լուծել առանց կրթական ոլորտի խոչընդոտների փոփոխության»:
Նիկոլ Փաշինյանը վստահեցրեց՝ ՀՀ պետական բյուջեի եկամուտները զգալիորեն ավելացել են, տնտեսական աճի տեմպերը հույս են տալիս, որ շոշափելի և տեսանելի կերպով կկարողանանք լուծել այդ խնդիրները գործնականում: ՀՀ վարչապետն ամփոփելով նշեց. «Սա այն դեպքերից է, որ պետք է յոթ չափենք, մեկ կտրենք: Հիմա չափելու գործընթացում ենք, շուտով կսկսի նաև կտրելու գործընթացը»:
Տաթև ՀԱՐՈՒԹՅՈՒՆՅԱՆ
