«Զարմանալի չէ, որ նոր կառավարության ներսում նման ցնցումային կադրային փոփոխություններ են լինում: Դա նշանակում է, որ կառավարության որակն ի սկզբանե եղել է ոչ ցանկալի եւ ոչ համարժեք երկրի խնդիրներին, ինչը Վանեցյանի դեպքում ասել չեմ կարող, որովհետեւ նա կադրային սպա է, իսկ ինչ վերաբերում է հետագա զարգացումներին, Նիկոլ Փաշինյանի մոտ հետապնդման խորացող եւ դավադրությունների տեսություններին համարժեք նոր վիճակ եմ տեսնում՝ գուցե արտաքին քաղաքական զարգացումներին համարժեք»,-լրագրողների հետ զրույցում այսօր անդրադառնալով ԱԱԾ տնօրենի պաշտոնից հրաժարական տված Արթուր Վանեցյանին, հայտարարեց ՀՀ փոխնախագահ Արմեն Աշոտյանը:
Նրա գնահատմամբ. «ՀՀ արտաքին քաղաքականության փոփոխության ռիսկ է առկա, որը մտահոգիչ է նրանց համար, ովքեր հասկանում են, որ հայ-ռուսական հարաբերությունները մեր անվտանգությունում ունեն հենասյունային նշանակություն»: Դառնալով ԱԱԾ նախկին ղեկավարին՝ ՀՀԿ փոխնախագահը նկատեց. «Գուցե ընդդիմադիր դաշտում եղել են մարդիկ, որոնք հրճվել են Վանեցյանի հրաժարականով: Վանեցյանի քաղաքական ծրագրերի մասին չգիտեմ, եւ դա բնական է: Բայց եթե նա կուզենա քաղաքական դաշտում դիրքավորվել (իսկ իր հայտարարությունն այդպիսին էր, դա հայտ էր. շախմատի կանոնով՝ ձեռք է տվել, ուրեմն պետք է խաղա, իսկ «սեւ»-ով, թե «սպիտակ»-ով՝ իր որոշելիքն է, մինչ այդ չորս հարցի պատասխան եմ ակնկալում՝ ինչպե՞ս է գնահատում Նիկոլ Փաշինյանի հոգեբանական վիճակը, ինչպե՞ս է գնահատում գործող իշխանության քաղաքականությունն Արցախի հարցում, ինչպե՞ս է գնահատում Նիկոլ Փաշինյանի քաղաքականությունը Ռուսաստանի հարցում եւ արդյոք Փաշինյանը Վանեցյանին տվե՞լ է հանձնարարականներ՝ քաղաքական ընդդիմադիրների հանդեպ գաղտնալսումներ եւ ապօրինի գործողություններ իրականացնելու: Մի հարց էլ ավելացնեմ՝ ե՞րբ է պատրաստվում պարոն Վանեցյանը պատմել նախորդ տարվա դեկտեմբերյան ընտրությունների ներքին խոհանոցի մասին: Սա բոնուսային հարց է, որի պարագայում Վանեցյանը կարող է օգտակար լինել»:
Արմեն Աշոտյանը չհստակեցրեց, թե ինչ «ներքին խոհանոցի» մասին է խոսքը:
Կարդացեք նաև
Լուիզա ՍՈՒՔԻԱՍՅԱՆ
