Գյումրու Սև Բերդ ամրոցում ՀՀ Անկախության տոնին նվիրված պաշտոնական միջոցառումը սկսվեց «Մեր ժամանակի հերոս» մրցանակաբաշխությամբ: Հերոսները 12-ն են, այս կոչմանն արժանանում են նրանք, որոնք մտածող են, աշխատող են, արարել են ոչնչից, հարթել իրենց ուղին, պայքարող են:
Առաջին մրցանակը տրվեց Ռուբեն Գևորգյանին. այն հանձնեց հանճարեղ կոմպոզիտոր Տիգրան Մանսուրյանը: Երկրորդ մրցանակը տրվեց Աստղիկ Գալստյանին, նա մասնագիտությամբ դեղագետ է, հերոսը խոստացավ Հայաստանի անունը թնդացնել աշխարհով մեկ, մրցանակը հանձնեց չեմպիոն Արթուր Ալեքսանյանը:
Այս մրցանակին արժանացած երրորդ անձն Արտակ Բոժիկյանն է, նրա մրցանակը հանձնեց «Լոֆտ» կենտրոնների գլխավոր տնօրեն Արևիկ Համբարձումյանը: Նշենք, որ մասնագիտությունները պաշտոնապես չեն հայտարարվում, այլ ցուցադրվում են կարճ հարցազրույցներ նրանցից:
Կարդացեք նաև
Չորրորդ հերոսը պանրագործ Արման Միքայելյան է: Մրցանակաբաշխությունը մերթընդմերթ ընդմիջվում է երաժշտական կատարումներով։
Մյուս մրցանակը հանձնեց վարչապետի խորհրդական Ռոբերտ Ղուկասյանը, որը Կալավան գյուղից է: Մրցանակը տրվեց Լյուդվիգ Միքայելյանին: Հերոսն իր ելույթում ասաց, որ մեր հույսը միայն բազուկը չպիտի լինի, այլ հայը պիտի ստեղծագործի, արարի, անհնարին ոչինչ չկա:
Հաջորդ մրցանակը հանձնեց ԱԺ պատգամավոր, աշխարհի չեմպիոն Արդեն Ջուլֆալակյանը․ ժամանակի հերոս դարձավ Վարդա Ավետիսյանը, որը հոգնել էր դժվարություններից ու որոշել է ստեղծել միջավայր, որտեղ մարդիկ կլինեն անհոգ ու երջանիկ, նա ստեղծել է ռեստորանային ցանց Երևանում: Նա ասաց, որ իր տեսակը ոչ միշտ է ընդունվել որպես օրինակելի հերոսի:
Ժամանակի 8-րդ հերոսին` հայրենադարձ ֆերմեր Արտակ Ղարանլղցյանին մրցանակը հանձնեց ՀՀ էկոնոմիկայի նախարար Տիգրան Խաչատրյանը: Վերջինս ասաց, որ միշտ ուզել է Ռուսաստանի Դաշնությունից տեղափոխվել Հայաստան, սակայն չի ստացվել, այժմ եկել է ապրելու ու արարելու Հայաստանում:
Ֆերմերը նաև ասաց, որ իր երեխաները չեն խաղացել ու իրեն են օգնել, իր գործընկերը ևս վերադարձել է ՌԴ-ից եւ հայրենիքում ջերմոց են հիմնել: «Եվրոպականը չի աշխատում, հայկականն է միայն աշխատում»,- ասաց հայրենադարձ հերոսը:
Հաջորդ մրցանակը հանձնեց Գյումրու քաղաքապետը, հաջորդ հերոսը Արփինե Բարսեղյանն է, որը խնամքի պարագաների արտադրությամբ է զբաղվում:
Հաջորդ մրցանակը հանձնեց Արցախի նախագահ Բակո Սահակյանը, որը, շնորհավորելով ՀՀ անկախության տոնն, ասաց` թող հաջողությունը ուղեկից լինի հայրենաշինության գործում: Մրցանակը Ստեփան Ավագյանին էր, նա արտադրում է բիովառելիք, որը տնտեսական մեծ օգուտ բերելուց բացի, անվտանգ է շրջակա միջավայրի համար: Հերոսը շեշտեց, որ բոլորի խնդիրը պետակաշինությամբ զբաղվելն է:
Նունե ԱՐԵՎՇԱՏՅԱՆ
