Ակտիվորեն հետեւելով վարչապետի ֆեյսբուքյան էջին, որն արդեն հասկացանք, ավելի հաճախ է թարմացվում, քան կառավարության կամ վարչապետի անձնական-պաշտոնական կայքէջերը, տպավորություն եմ ստանում, որ պարոն Փաշինյանի հետ տեղի է ունենում այն, ինչի համար նա մեղադրում էր Սերժ Սարգսյանին: ՀՀ վարչապետը չի տիրապետում իրավիճակին, գնալով ավելի ու ավելի խճճվող իրավիճակին եւ գնալով՝ ավելի ու ավելի շատ: Եթե տիրապետեր, ապա կիմանար, որ եթե Հանրապետության ԱԱԾ տնօրենը հրաժարական է տալիս՝ դուռը հետեւից չրխկացնելով, եթե Հանրապետության ոստիկանապետն ազատվում է աշխատանքից, ապա չի կարող Հանրապետության վարչապետը որեւէ բան չասել ՀՀ քաղաքացիներին, այն քաղաքացիներին, որոնք նրա սուրն են ու վահանը՝ միաժամանակ:
Ավելին, առնվազն աբսուրդ է, երբ ԱԱԾ տնօրենի, ապա եւ ոստիկնապետի պաշտոնանկություններից հետո երկրի Ազգային անվտանգության խորհուրդի նիստ է հրավիրվում, որին մասնակցած ԱԺ նախագահն ու ՊՆ ղեկավարը հայտարարում են, թե նիստում ոստիկանապետի պաշտոնանկությունը չեն շոշափել: Պարոնայք, բա ի՞նչ եք շոշափել, եթե հաշվի առնենք, որ ձեր հավաքի օրը ոչ ԱԱԾ-ն տնօրեն ունի, ոչ էլ ոստիկանությունը՝ պետ: Գուցե Երեւանի ա՞ղբը, որը մեկ անգամ տեսնողը Երեւանն ամենեւին էլ չի համարի արժանապատիվ ու հպարտ քաղաքացիների մայրաքաղաք:
Իրավիճակն իրականում ավելին քան լուրջ է: Մանավանդ, երբ հիշում ենք, թե ի՞նչ օրինագիծ է մութ ընդդիմադիր «Լուսավոր Հայաստանը» բերել ԱԺ եւ արդեն իսկ առաջին ընթերցում միաձայն անցկացրել: Ըստ դրա, օրինակ, ԱԱԾ տնօրեն կարող է նշանակվել 25 տարեկան լրացած ՀՀ որեւէ քաղաքացի, կարեւոր չէ, որ նա ԱԱԾ-ի մասին գիտի միայն այն, որ այն գտնվում է Նալբանդյան փողոցում: Նույնը՝ ոստիկանապետը, որի պաշտոնին հավակնողները եւս պարտադիր չէ, որ համակարգում ծառայած լինեն, նրանք պարզապես պետք է համապատասխանեն ԱԺ պատգամավորի համար պահանջվող սահմանադրական չափանիշներին:
Բայց այս ամենի մասին ՀՀ վարչապետը Ֆեյսբուքում գրառում չի արել: Նորմալ է. կարեւորն այն է, որ ԵՄ երկրներից ավելի քիչ ենք ապաստան հայցել այս՝ դեռեւս չավարտված տարում: Սա էլ է նորմալ. չէ՞ որ կինոն անչափ հետաքրքրական է եւ բոլորս այստեղ հանգիստ նստած սպասում ենք, թե ինչպես է այն ավարտվելու: Ես մի տարբերակ ունեմ, բայց չեմ ասի, թող Սորոսի հիմնադրամը փող հատկացնի՝ սցենարի զարգացման համար, նոր կասեմ…
Կարդացեք նաև
Հովիկ ԱՖՅԱՆ
Հոդվածն ամբողջությամբ՝ «Ազգ» թերթի այս համարում
