«Կոռուպցիայի դեմ պայքար ընթացել է, գոհացնում են տեմպերը, թե ոչ՝ երկրի քաղաքական ղեկավարությունը կասի եւ ասել է: Ինչ վերաբերում է նոր շունչ տալուն, անընդհատ այդ հանցավոր երեւույթի դեմ պետք է պայքարել: Աշխարհի բոլոր երկրներում դրա դեմ հետեւողականորեն պայքարում են, որովհետեւ եթե արմատախիլ արվի, ընդունենք համակարգված կոռուպցիան կամ չարվի վարչական ներքեւների կոռուպցիան, բնականաբար դա չի ընկալվի որպես ամբողջական մոտեցում: Այդ առումով պետք է ընդհանուր կոմպլեքս լուծումներ տրվեն թե օրենսդրական, թե աշխատանքային, ինչը որ հույս ունեմ կկատարվի»,-ասաց ՀՀ ոստիկանապետի ժամանակավոր պաշտոնակատար Արման Սարգսյանը՝ Նախագահի նստավայրում պատասխանելով լրագրողների հարցերին:
Նա չպատասխանեց այն հարցին, թե ի վերջո ինչու Օսիպյանին աշխատանքից ազատեցին, ընդամենն ասաց. «Ես ծառայող եմ եւ ծառայելու եմ իմ պաշտոնում, ինչպես ծառայել եմ մինչ այդ զբաղեցնելով ոստիկանապետի առաջին տեղակալի պաշտոնը: Մի բան կարող եմ ասել` կփորձեմ հանրության ընկալման մեջ ոստիկանության դերի վերաբերյալ մոտեցումները որոշակի առումով ավելի լավացնել»:
«Ազատություն» ռ/կ-ի հարցին ` սպասում է, որ ոստիկանությունը քաղաքացիական դե՞մք կգլխավորի, երբ համապատասխան օրենքը ուժ ստանա, Սարգսյանը պատասխանեց. «Այդ հարցին չեմ կարող պատասխանել, միայն կասեմ, որ ես ծառայող եմ, ունեմ տված երդում, նաեւ խղճի հետ կապված խոստում, որ պետք է կատարեմ իմ պարտականությունը ու դուք հետագայում գնահատականը կտաք»:
Aravot.am-ի հարցին` որ դեպքերում փոխզիջումների չի գնա, Արման Սարգսյանը պատասխանեց. «Որեւէ դեպքում կոմպրոմիսների չեմ գնա, կոմպրոմիսը իմ պարագայում խնդրում եմ բացառեք»:
Կարդացեք նաև
Իսկ արդյոք Ամուլսարի ճանապարհի բացման պարագայում ուժ կկիրառվի, ՀՀ ոստիկանապետի պաշտոնակատարը չցանկացավ պատասխանել. «Այդ հարցով կարծում եմ լուծումներ կգտնվեն, իսկ այսօրվա ամենաակտուալ թեման կոռուպցիան է»:
Գոհար ՀԱԿՈԲՅԱՆ
