Կարմիր խաչի ներկայացուցիչները երեկ ՀՀ պաշտպանության նախարար Դավիթ Տոնոյանին պաշտոնապես փոխանցել են Ադրբեջանի առաջարկը`«երկուսը- երկուսի» դիմաց` երկու հայ գերիներին ադրբեջանցի երկու դիվերսանտների հետ փոխանակելու: Այսօր լրագրողների հետ զրույցում նախարարն ասաց, որ որոշակի մանրամասների եւ ճշգրտումների հարց կա. «Կան քննարկման որոշ խնդիրներ, որոնք ես հիմա բացահայտել չեմ կարող: Երբ կստանանք այդ ճշգրտումները ադրբեջանական կողմից` կարձագանքենք»:
Նախարարն ասաց, որ հայկական կողմը սկզբունքորեն դեմ չէ ՀՀ քաղաքացիներին վերադարձնել իրենց տները եւ աջակցելու է այդ գործընթացին։ Բայց հարցին ինքը բացառապես փոխանակման տեսանկյունից չի մոտենում. «Ես աշխատում եմ, որ իմ քաղաքացիներին վերադարձնեմ Հայաստան»:
Հարցին, որ Ստեփանակերտը կոշտ էր արձագանքել` հայտարարելով, որ Ադրբեջանի առաջարկով փոխանակումն անհնար է, Դավիթ Տոնոյանն ասաց, որ ինքը տեղյակ չէ Ստեփանակերտի նման դիրքորոշումից, ինքը ոչինչ չի բացառում, բայցեւ վերջնական որոշումը կայացվելու է Ստեփանակերտում:
Դիտարկմանը, որ Ադրբեջանում կա երրորդ գերին, որի մասին չի խոսվում, Դավիթ Տոնոյանը պատասխանեց. «Մեզ մոտ էլ ավելի շատ ադրբեջանցի գերիներ կան»:
Կարդացեք նաև
Այլ մանրամասները` տեսանյութում
Նելլի ԳՐԻԳՈՐՅԱՆ
