armtimes.com. Ազգային անվտանգության ծառայության տնօրենի և Ոստիկանության պետի պաշտոններից Արթուր Վանեցյանի և Վալերի Օսիպյանի ազատվելու որոշումները եղել են վարչապետ Նիկոլ Փաշինյանինը:
Այդ մասին այսօր՝ սեպտեմբերի 18-ին, «Քաղաքացիական պայմանագիր» կուսակցության վարչության նիստից հետո լրագրողների հետ զրույցում հայտնեց վարչապետի աշխատակազմի ղեկավար Էդուարդ Աղաջանյանը:
«Երկու պաշտոնյաների գործունեությունն իրենց գործառույթների շրջանակներում վարչապետին չի գոհացրել, չի բավարարել: Վալերի Օսիպյանին նշանակելով վարչապետի գլխավոր խորհրդական՝ կառավարության ղեկավարը վստահաբար գտել է, որ նա այդ պաշտոնում օգտակար կլինի: Արթուր Վանեցյանը և Վալերի Օսիպյանը հրաժարական են տվել վարչապետի որոշմամբ: Այս պահի դրությամբ ԱԱԾ տնօրենի և Ոստիկանության պետի պաշտոններում նոր նշանակումների վերաբերյալ որոշումներ չկան»,-լրագրողներին ասաց Աղաջանյանը:
«Ինչ վերաբերում է վարչապետի և պարոն Վանեցյանի հայտարարությունների դիսոնանսին, ապա դա եղել է վարչապետի որոշումը, իսկ ասուլիսի ժամանակ վարչապետի հնչեցրած խոսքում հարգալից տեքստը պայմանավորված էր նաև գեներալների նկատմամբ հարգանքով: Որպեսզի տարընթերցում չլինի՝ ուզում եմ ևս մեկ անգամ արձանագրել, որ վարչապետի որոշումն է եղել նրանց ազատել աշխատանքից: Նրանց հնարավորություն է տրվել դիմում ներկայացնել և նրանք ներկայացրել են դիմում»,-եզրափակեց Աղաջանյանը:
